Hmuchhuaktu Prof. Lalnuntluanga

ZORAM TODAY | September 15-5 October, 2015 -Fela Ngente

Prof. Lalnuntluanga, Mizoram University-a Dean, Students’ Welfare (DSW) ni lai leh, Environmental Science Department-a professor ni mek chuan research scholar eng emaw zat kaihruaiin a hnuaiah hian mi pathumin Ph.D an zo tawh a, Ph.D scholar kaihhruai (guide) mek mi 8 lai a nei bawk. A hnuaiah vek hian M.Sc. dessertation submit tawh mi 20 chuang an awm tawh.

Prof. Lalnuntluanga hi September ni 24, 1975 khan Aizawl-ah a piang a, unau 8 zinga a upa ber a ni. Naupang harhvang leh duhawm tak niin Zemabawk Venglai-ah a seilian bawk. Zirna kawngah a tluang em em a, Nursery atanga Ph.D a zawh thak thlengin Mizoram chhungah vek a zir a ni. Ama insawi dan takah Durtlang pelin lehkha a zir ve ngai lo!

Academic line-ah chuan Mizoram tihmingthatute zinga mi a ni a, zirtirna mai bakah zirbingna (research) lamah a kal nasa em em a, a thawhpuite leh a nauteho nen thil thar eng emaw zat an hmuchhuak tawh a, tun hnaiah sangha chi (species) thar danglam tak an hmuchhuak leh bawk. 

Zirna kawng
Sawi tawh angin Mizoram (Aizawl) chhungah zirna kawng hi a zawh zo thak a, Matric (HSLC) chu Zemabawk High School atangin first division-ah a zo va, Pre-University (P.U/Class XII)-ah Science subject lain Pachhunga University College atangin tha takin a zo leh a. Bachelor of Science (B.Sc)-ah Botany subject lak chhunzawmin P.U. College atang vek hian 1997 khan a zo (graduate) leh bawk. Chutih lai chuan Mizoram-in University kan la neih loh avangin NEHU Mizoram Campus-ah M.Sc. a zawm a, 2000 kum khan zovin pakhatna (gold medalist) dinhmun a hauh nghe nghe. M.Sc. a zawh atanga kum khat hnu lek, kum 2001 khan National Eligibility Test (NET) a paltlang nghal bawk.

December ni 3, 2010 khan Lalrochami Ralte (Sr. Civil Judge, Serchhip) nen inneiin fapa leh fanu pakhat ve ve an nei tawh a. New Secretariat Complex-ah khawsain an lawina kohhran (New Secretariat Complex Prebyterian)-ah Tualchhung Upa a ni mek.

Eizawnna lam
October 2001-ah Mizoram University (Forestry Department)-ah Technical Assistant-in a lut a, 2003 kumah Environmental Science department-ah Lecturer (Tunah chuan Asst. Professor an ti tawh) atan lak leh niin 2001 atanga February ni 18, 2008 thleng Forestry department lamah Lecturer hna hi a thawk leh bawk a ni. Hetih lai hian research bei chho zelin kum 2007 khan doctorate degree (Ph.D) a hmu a, a thesis chu Study on Taxonomy Distribution and Utilisation of Rattans/Canes in Mizoram tih a ni. 

February ni 19, 2008 atangin Environmental Science department lamah Reader-ah kaisangin a hnu kum thum 2011 February ni 19-ah vek Associate Professor-ah a kaisang leh a, a hnathawh that leh a kutchhuakte avangin February ni 19, kum 2014 khan Professor puitlingah hlankai a ni ta a ni. Hetih lai hian kum 38 leh thla 5 chauha upa niin Mizo Professor zingah chuan a naupang ber a nih hial a rinawm. KTP over hmaa hetiang ni thei hi Mizo zingah an la awm kher âwm lo ve! Mi taima leh thawkrim tak a ni.

Tunah hian Mizoram University-ah Dean, Students’ Welfare (DSW) ni mekin University committee pawimawh hrang hrangah member a ni nual bawk. DSW a nih hnu hian Mizoram University pawhin hma a sawn nasa hle. A thawhpuite nen central lam atanga research project sum tam tak haichhuakin zirlaite hmasawn nan a thawh hlawk hle a, zirlaite enkawltu ber (DSW) niin harsatna tawk zirlai tam tak a tanpui thin a ni.

TlangkawmnaProf. Lalnuntluanga hi kohhran leh khawtlanga mi inhmang tak a ni a, YMA Life Member niin Zemabawk Venglai-ah Office Bearers te pawh a lo ni tawh thin a. Youth Hostel Association of India, Mizo Academy of Sciences leh Indian Mountain Initiatives-ah te life member a ni bawk. 

Tunah hian Mizoram State Innovation Council leh Mizoram State Biodiversity Board-ah member ni lai a ni a, Environmental Information System (ENVIS) Mizoram-ah Advisory Board member a ni mek bawk. 

Kum 2013 atang khan a thawhpuite — Dr. Lalramliana, Asst. Professor, Department of Zoology, PUC; Samuel Lalronunga & S. Beihrosa, Research Scholar, Department of EVS te zirbingna neiin sangha chi thar an hmuchhuak tan a ni.

Sangha chi thara puang tur hian tih tur leh paltlang ngai a tam hle a. A hmasa berah chuan a sangha pianphung chhung lam leh pawn lam ngun taka zir chian a ni a, a chipui hnaivaite nena zirbing niin, an danglamna te chiang taka tarlan leh a ni. Hemi ti tur hian museum-a sangha an vawn thatte nena zirchian thin a ni bawk.

Hemi hnu hian sangha chu a chi thar ngei a ni tih pawmpui turin scientific journal-ah thehluh leh a ni a, mithiamte’n uluk taka an endik leh hnuah a chi anpui awm lo ngeite chu khawvel hriatah sangha chi tharah puan chhuah a ni ta thin a ni.

Prof. Lalnuntluanga leh a thiante hian an zirbingna kawngah hian Dr. Heok Hee Ng an thawhpui a, ani hian a pui nasa hle. Dr. Heok hi mi thiam tak niin Asia khawmualpuia sangha museum changtlung tak, Raffle’s Museum, Singapore University-a thawk a ni nghe nghe. Mizoram atanga sangha an hmuhchhuah tharte chu:

1. Garra dampaensis 2013
Hmuhchhuahna hmun: Seling river, Dampa Tiger Reserve, Karnaphuli drainage

2. Schistura maculosa 2013
Hmuhchhuahna hmun: Pharsih & Tuingo lui, Kawlbem, Barak drainage.

3. Pseudolaguvia nubila 2013
Hmuhchhuahna hmun: Sala lui, Lungbun, Saiha district, Kaladan drainage

4. Psilorhynchus khopai 2014
Hmuhchhuahna hmun: Tuisi lui, Khopai, Saiha district, Kaladan drainage

5. Schistura andrewi 2014
Hmuhchhuahna hmun: Mat lui, Serchhip, Kaladan drainage

6. Eutropiichthys cetosus 2014
Hmuhchhuahna hmun: Kaladan lui, Kawlchaw, Lawngtlai district, Kaladan drainage

7. Psilorhynchus kaladanensis 2015
Hmuhchhuahna hmun: Tuisi lui, Khopai, Saiha district, Kaladan drainage

8. Exostoma sawmteai 2015
Hmuhchhuahna hmun: Pharsih & Tuingo lui, Kawlbem, Barak drainage

* Barak drainage hi Mizoram hmar lama luang lui sawina a ni a; Kaladan drainage hi Chhimtuipui leh a fintu zawng zawng, Tiau, Mat etc. sawina a ni.

Schistura : Dawntial
Psilarynchus : Nghalungbet/Nghalungbawk
Psedolaguvia : Nghaberbek
Eutropiichthys : Nghahar