Mizoram-ah Chanakya IAS Academy

ZORAM TODAY | September 1-14, 2015 - Lalremruata Chhangte

Mizo thalaite’n UPSC leh MPSC  exam hrang hrang hmachhawn tumin theihtawp an chhuah a, tun hnaiah exam tum zirlaite’n coaching class kal an intihhmuh nasa a, thil intihhmuhah chuan a tha lam tak ni pawhin a lang. Kan ramah sawrkar hna nghet leh tha thawh tur a vàn avangin heti lamah pawh hian kan thalaite an kal na ta niin a hmuh theih.

Hmanah chuan

Mizorama coaching class mumal taka kalna awm hmasa ber pawl chu Study Forum, Chanmari, Aizawl ami hi a ni awm e. Tunah pawh hian pangngai takin a la kal zel a, zirlai chher chhuah pawh an ngah tawh viau a ni. Kum 2009-2011 chhung khan Mizoram Youth Commission (MYC) kaltlangin Lord Krishna Mission (IAS Academy) chu chah chhuah a lo ni tawh a, hemi tum hian sawrkarin cheng nuai 33 lai a sêng nghe nghe a, thalai thahnem takin an chhawr tangkai em em a ni. Sawrkar sum harsatna avangin he academy hi kalpui zel theih a ni ta lo. Chumi hnuah Aizawl-ah mimalin coaching academy te an rawn din chho va, Zarkawt-ah Career Point leh Vaivakawn-ah Vaj Rao IAS Academy awmin heng coaching academy-a kal zirlai thahnem tak chuan hna tha tak tak an hmuh phah a, an chhawr tangkai hle. Hengahte hian tun thlengin zirlai thahnem takin class an kal mek a ni.

Chanakya IAS Academy

Mizoram Youth Commission chuan India rama civil service coaching academy tha ber ber te chah chhuak turin ruahmanna an nei a, hei hi Chief Minister Lal Thanhawla pawhin tha a tiin a ngai pawimawh hle niin a lang. August ni 17, 2015-a Chief Minister hova sawrkar mi pawimawh thukhawm rel angin kumin September thlaa tan theih turin India rama coaching academy hrang hrangte biak a ni a. August ni 21, 2015 khan heng — Rau’s IAS Circle, Delhi; Brilliant Tutorials, Chenai; Brain Tree, Hyderabad; Chanakya IAS Academy, Delhi; Carrier Plus, Delhi; Lord Krishna, Delhi; Vajiram & Rani, Delhi; Khan Study Circle, Delhi te be pawpin an kal dan tur te, an inchhiarna zat te chu August thla ral hmaa hrilh turin ngenna a thlen a, August ni 24, 2015 khan Classic IAS Academy, Drishti IAS, Eten IAS Academy leh Step Up IAS te a be pawp bawk.

Heng IAS coaching academy hrang hrangte zingah hian Chanakya IAS Academy chu Mizoram-a lo lut tura an beisei ber a ni a, hei bakah hian Lord Krishna IAS Academy leh Delhi Education Center te chu sawrkar ngaihven zual deuh niin Mizoram Youth Commission hotute chuan ZORAM TODAY an hrilh.

Chanakya IAS Academy hi kum 1993-a din a ni a, civil service hrang hrang atan coaching an pe thin a, zirtirtute pawh mithiam tak tak an ni tlangpui. Preliminary stage a\anga interview thlengin coaching an kalpui a; ke thu buatsaih lai thleng hian sawrkar chuan Chanakya IAS Academy chungchangah ziaka tihfel engmah a la nei lo nia hriat a ni.

Chanakya IAS academy hian India ram chhungah study centre 11 an nei a, Delhi-ah North Delhi leh South Delhi-ah hmun an nei a, Gurgaon, Pune, Ranchi, Hazaribagh, Patna, Jaipur, Chandigarh, Ahmedabad leh hmarchhak state-ah Guwahati-ah hmun an nei mek a; library leh reading room an pe tel bawk.

Mizoram Youth Commission hotute leh Chanakya IAS Academy hotute’n inbiakna an neih danin, Mizo zirlai coaching class kal tur hi 200 chin lak tur a ni a, zirlai pakhat zelin course fee-ah a vaiin Rs. 1,30,000 an chawi ang a, zirlai 100 an nih chuan zirlai pakhatin Rs. 1,50,000 an chawi thung dawn a ni. Hengah hian sawrkarin classroom, office leh library a tumsak ang a, a bak zawng—zirtirtute zin veivahna, an ei leh in, an riahna, an thlenna zawng zawng chu anmahni intum chawp tur a ni thung. 

Lord Krishna IAS Academy leh sawrkar indawrnaah chuan zirlai naupang 200 chinah zirlai pakhatin Rs. 65,000 zel an chawi ang a, zirlai 100-ah zirlai pakhatin Rs. 75,000 an chawi thung. Ei leh in, zirtirtu zin veivahna leh thil dang office thlengin sawrkarin a ngaihtuah vek a ngai thung.

Engtin zel...?

“Ngun taka ngaihtuahin Chanakya IAS Academy nena kan indawrna kawngah an duh dan leh kan duh dan kalphung hi a inhne tlang berin kan ngai a, sawrkarin zirlai fee a tumsak tur hi thahnem viau mah se kan tana tha zawk tura kan ngaih avang leh, kumin September-a class tan hman kan duh bawk si avangin anni IAS academy hi thlan âwm niin kan hria,” tiin Mizoram Youth Commission hotute chuan ZORAM TODAY an hrilh.

He IAS coaching academy-a lut tura ruahmanna an siam dan chuan, faculty-te’n General English, General Essay leh GK hmangin written test an nei thlap ang a, interview an neihpui bawk ang a, chuta titha Mizo zirlaite chu coaching academy-a lut turin an thlang dawn niin MizoramYouth Commission hotute chuan an sawi.

Mizoram Youth Commission Secretary J.T. Vanlalngheta chuan, “Thutlukna tak engmah kan la siam thei lo na chungin, kan duh dan chuan zirlaite fee chawi tur hi sawrkar tumtir vek a fuh lohna a awm thei a, Rs. 1,50,000 chawi turah Rs. 1,00,000 vel chu zirlai pakhat zel atan sawrkarin a tumsak ang a,a bak zawng chu zirlaite tumtir a tha zawk dawnin kan hria,” tiin a sawi.

Chanakya IAS Academy lo lut tur chungchangah Aizawl-a hlawhtling taka civil service coaching academy kalpui mektu Career Point, Zarkawt neitute chuan ZORAM TODAY zawhna chhangin, “He thil lo thleng tur hi keini chuan tha kan ti lutuk. Keimahni zirlaite nen competition sang tak a awm theih phah dawn a, chutih rualin zirtirtute’n Mizo zirlaite hmakhaw ngai taka zirna an kalpui loh chuan thil fuh lo a awm ve thei tho mai a, hlawhtling taka sawrkarin a kalpui theih kan duhsak a ni,” tiin an sawi. Career Point hi 2013-a din tan niin zirlai an ngah lai berin 200 dawn an nei thin a, zirtirtu hi state dang leh Mizoram atangin pariat vel an chhawr mek a, course fee zawng zawng hi zirlai pakhat zelin Rs. 30,000 an chawi a ni.