ZORAM TODAY | November 17-30, 2015
Amah chu...amah chu kum 31 mi a ni. Kum 2012 khan Mizoram University atangin Master of Science (Botany) a zo va, 2nd division-ah a pass. Hemi hnu hian private company-ah te a inhlawh lawp lawp a, kum 2014 atangin Zoram Entu Pawl (ZEP)-ah State Project Coordinator a ni a; thla tin cheng sing chuang fe a hlawh. Chu chu kalsanin, thla tina cheng sing chuang fe sengso turin ran vulh a tan ta! A hming chu H. Laltanpuia, Lunglei tlangval a ni.
Lunglei Electric Veng-a cheng, H. Laltanpuia farm hi Lunglei khawpui atanga Lawngtlai kawng km 10 vela hla, New Life Academy awmna thlang, ABCI Company inkulhna thlen hma lawk kawngpui thlang maiah a awm a. Tin hnih hmun ramah chuan vawk 60 vel lek ar 150 vel a vulh mek.
H. Laltanpuia hi Vanlalduhi leh H. Herliana fapa naupang ber a ni a, December ni 4, 1986-ah Lunglei-ah a piang a. Lunglei-ah zirna bul a tan a, HSLC hi Lawngtlai-a Ngurnunsangi English School (NES) atangin a zo va, HSSLC hi Don Bosco School, Bawngkawn, Aizawl atangin a zo bawk. Lunglei Government College-ah B.Sc hi a zo va, Mizoram chhungah a zirna zawng zawng hi a hlen chhuak vek a ni.
Lawngtlai-a sikul a kal lai hian a bul tan nan vawk note pakhat chu a hawn a, hei hi in lamah an vulh pung a. College a kala a haw changin vawk note a hawn zel bawk a. Ran vulh hi a tuina leh châk ber a ni thin. College a chhuah hian a chhungte hnenah zir zawm tawh lova ranvulh a duh thu a hrilh a, a chhungte erawh chuan lehkha la zir se an duh avangin Mizoram University-ah kum 2010 khan a lut thla a. Tha takin a zir chhuak leh ta a ni.
Mizoram University atanga a zir chhuah hnu pawh hian a ngai tê bawkin, a chhungte bulah ranvulh a duh thu a sawi a. Nimahsela, a nu leh pate pawhin hna an la thawh theih tho avangin hna remchang dang a thawk a. Insurance company thenkhata a thawh hnuah, kum 2014 atangin Zoram Entu Pawl-ah a thawk zui a.
Hetia Aizawl-a hna thawka a awm lai hian, high school a zir laia a vawk note hawn chu a chhungte chuan in lamah an lo vulh pung a. An kawmthlangah vawk in an sa mai a, chutah chuan vawk 60 vel chu an vulh hman.
Kum 2015 a han ni a. A lung lêntu ber vawk vulh chu a sawi leh ta a. A châkna chu khap daih theih a ni ta lo. Vawk vulh turin Lunglei-ah a phei nghal a, tuna an farm hmun ni ta, Vawngzawl ramah a in an sa nghal chur chur a. Hetih lai hian hlawhfate chhawrin an bei nasa hle a, cheng nuai tel fe chu an sêng a ni. A in an sak zawhah ina an vawk lo vulh pun tawhte chu an suan phei ta a ni.
A vawk vulhna atang hian hlawkna a la hmu meuh lo va, thla tin vawk chaw leh ar chaw manah cheng 20,000-30,000 an seng ziah a, vawkchaw atan changel, japanhlo, biskuit chhia leh buhfai an hmang ber. A in tur an sak zawh hnuah amah Tpa hian a enkawl chawt a, an u pakhat leh a pate’n an pui bawk. Hetih lai hian vawk note chu cheng 5000-in a hralh a, a pui hralh chur chur tham erawh a la awm meuh lo.
Mizote’n vawksa kan ei nasat avangin a market lamah harsatna a tawk lem lo. Lunglei-ah pawh a vawk farm neih chu an hre lar chho tan a, hralhna tur chu a awm deuh reng tawh a ni.
He hna thawkin a thawkrim em em a, zing khawvar tirh atangin vawk chaw buaipuiin hna a thawk tan a; tlai thim thet thetah a chawl thei chauh thin. Kum tira vawk a vulh tan lai khan kg 80 chuang zeta rit a ni a, kum khat dawn a vei meuh chuan kg 65 vel chauh a ni tawh! A dul kiar ve pang mai pawh a thêp vek a, hnathawk nasa tih hriat takin a thû chhàl a, a bek leh biang vel chu thlantui luan leh bual hnu a ni tih a hriat hle.
ZORAM TODAY-in a hmuna a tlawhnaah, Tpa hian a harsatna tawhte chu a lo sawi siam siam a. “Ran a damlohvin a buaithlak hle. A hmun a hlat tham deuh avangin ran doctor-te’n an rawn pan thei meuh lo va, phone hmangin Aizawl lama ran doctor-te ka râwn thin,” tiin a sawi. Ran damlo thi tawp an awm nual tawh nghe nghe.
“Chaw ei a tui a, taksa hah mah se rilru a hlim em em a ni,” tiin a sawi. A awmna hmunah phone signal a awm loh avangin a khawharthlak thu te, thla ên laia a lunglenthlakzia te, an piah lawka ABCI company hnathawkte avanga hmun reh tak a nih loh thu te pawh a
A hmunhma a rem hle. A thlangah thlai leh thei an chîng a, serthlum pawh a rah that lai tak a ni. Changel pawh a tam avangin vawk chaw-ah a la buai lo. Tui lakna a hnai a, a piah lawk luite-a tui an pipe a, tui dahkhawlna tuizem an hûng bawk. Electric current a lut lo va, a hranpaa transformer bun a ngaih avang leh a hautak avangin, nizung chakna (solar energy) hmangin a mamawh zualpui êng a chhî a ni. Vawk hi vulh belh zel tumin vawk in tur an sak belh mek a, vawk in chhakah ar in a awm phei zui a. Ar puitling a la awm lo.
Heng zawng zawng buaipui nan H. Laltanpuia hian sawrkar atangin tanpuina cheng khat mah a dawng lo va, a dil hek lo. NLUP a dawng lo va, a vui hek lo.
“Sawrkar hian NLUP vawk note sem tur hi ram dang atangin man to tak takin a la lut tho va...” tiin a sawi a. Sawi tlang dawt duh lovin, “Supply tur awm sa leh hralh zat tur hre saa vulh chu a nuam bik em em a ni,” tiin a sawi a ni. Nia, NLUP vawktê atana vawk note to tak taka foreign atanga chah luh ai chuan, Mizoram chhunga Mizo vawk vulh ngei lei theih ni sela chuan a inhmeh bik hle tur a ni a, mahse, chutiang a ni ta si lo a ni.
“Sawrkar atangin tanpuina te dil ve la. Sawrkar pawhin hetianga mahni intodelha tih tak taka beite tanpui hi a châk alawm,” tia ZORAM TODAY-in thurawn kan pek chuan a nui mai a. “Tanpuina kan dawng lo pawh hi a thatna lai a awm. Sawrkar tanpuina dawng ila, an tanpuina avanga hetiang dinhmun thleng theiah min chhuah emaw a ni ang a, keini’na kan lo thawh hahna leh kan lo buaipui hahna zawng zawng a lân vek dawn a...” tiin a sawi a, a dik viau si.
Pathianni-ah pawh a haw hman meuh lo. Thian a kawm hman lo va, nula a rim hman hek lo; nitin vawk leh arte nen nun an hmangho thin. Mahse.... Mahni intanpuite chauh hi Pathian-in a tanpui thin si.
Ka chak ve zawng tak ...
ReplyDelete