March thla chhung zirna in zawng zawng khar a ni dawn

Vawiin khan Health Minister Dr. R. Lalthangliana hovin Health & Family Welfare Board Meeting, Secretariat Conference Hall, MINECO ah neih a ni a. Covid-19 chungchanga ngun taka Sawrkar hmalakna kawng hrang hrang ngaihtuah ngai a awm avangin, meeting ah hian Health and Family Welfare Board Vice Chairman Dr. ZR Thiamsanga, Chief Secretary Pu Lalnunmawia Chuaungo leh H&FW Secretary Pu H.Lalengmawia te bakah Home Department, Finance Department, Health & Family Welfare Department, Higher & Technical Department, School Education Department, Disaster Management and Rehabilitation Department, Women & Child Development Department aiawh leh midangte an tel a ni.

ZORAM TODAY| AIZAWL: Sorkar thuchhuahin a tarlan danin The Epidemic Diseases Act, 1897 (Act No. 3 of 1897) tlawh chhanin leh Chief Minister Pu Zoramthanga be rawnin thuthlukna naktuk Ni 17. 3. 2020 (Thawhlehni) atanga Ni 31. 3.2020 (Thawhlehni) thleng University, College, School, Anganwadi leh Pre-school zawng zawng khar ni se, tih a ni. Exam nei laklawh lai te erawh chu a ngaiin kal se tih rel a ni a. Thil awmdan a zirin heng zirna in hrang hrangte hawn hun rel leh ni se, tih pawm a ni.

Mi hrang hrang kalkhawmna hmun - Gym, Picnic Spot, Cinema Hall leh Swimming Pool te pawh Ni 17.3.2020 - Ni 31.3.2020 chhunga khar tura rel a ni a. Sawrkar District Hospital hrang hrang leh private leh kohhran enkawl hospital zawng zawngah mipui punkhawm khap mek chu chhunzawm zel ni se tih rel a nih bakah puipunna hnaivaia awmlo turin leh puipunna a kal lo tura mipuite ngenna siam ni se tih a rel a. Residential Institution leh Home hrang hrang te pawh pawn lam atanga tlawh phalloh ni se, tih rel a ni bawk a ni. Hengah te hian Admission mamawh an awm a nih chuan medical screening uluk taka neih hnu ah chauh admit thin tur an ni.

Meeting hian Kohhran hrang hrangah Covid 19 chungchanga hriattur pawimawh leh mithiam ten invenna atana pawimawh tihtur leh tih loh tur an duan chhuah inhrilh hriatna neiturin Mizoram Kohhran Hruaitu Committee (MKHC) kaltlangin Sande sikul (sunday school) ah hmalak ni se tih remtih a ni a. A ni tan Ni 22. 3. 2020 rel a ni.