Lemziaktu lârin tihluihnaa kum tling lo mutpui sual a ni tih hre lo!

ZORAM TODAY | October 6-19 October, 2015-Hriatpuia Khiangte

Lemziah lama kut hmui leh khawvel hriat hlawh khawpa invawrh sáng Dennis Nona chuan vànduaithlâk takin kum tling lo hmeichhe naupang a sual. Mahse, hei aia vànduaithlâk chu tihluihnaa kum tling lo mutpui hi sual a ni tih a hre ta lo chu a ni!

Dennis hi Australia-ah phei chuan amah chiah lemziak thiam a awm emaw tih mai tur khawpa lâr, lemziak thiamte hming sawi apianga lam hmasak hlawh ber pawl a ni a, a kutchhuak máwi tak tak a tlar laiin mipat hmeichhiat lamah a hniak a pherh ta a ni.

Kum 12-a upa he hmeichhe naupang, Dennis-a'n tum eng emaw zat a mutpui nia sawi hi Canberra mi a ni a, amah bakah hian a laizáwnnu pawh Dennis hian a zuah bik lo nia sawi a ni. A rái tih a inhriat meuh chuan he hmeichhe naupang hian chawlhkar 20-a upa nau a lo pai reng tawh. Chu mi hnuah Dennis-a fà chu hring ngam lovin a titla ta a ni.

Dennis hian a pawikhawih chu pha kual nghal lovin a pawm mai a, chutih rualin, Jail-a luh loh hrâm dan zawngin tan a khawh nasa hle. “Tihluihnaa naupang mutpui hi sual a ni tih ka hre lo takzet. Tin, ka seilenna Badu thliarkarah nupui pakhat aia tam neih a thian avangin tuna ka thil tih hi pawikhawihna a ni tih ka ngaihtuah pha ngai lo,” tiin a sawi. A pawikhawih avangin Dennis hi kum 9 chhung zet chu táng châw a bàr ve a ngai dawn a ni.