ZORAM TODAY | September 1-14, 2015
Tun hnaiah Mizoram-ah ruihhlo a hluar thar a, CYMA hnuaia Supply Reduction Service (SRS)-in kumin April thla atanga thla nga chhunga ruihhlo an man tawh zawng zawng hi tualchhung rate-ah cheng maktaduai 38.713 man hu a ni.
April ni 6, 2015 khan CYMA hnuaia Central Executive Committee (CEC)-in SRS din thar leh a pawm hnuah, April ni 11 zing atangin SRS chuan ruihhlo do beihpui an thlak tan nghal a, August ni 20 thleng khan heroine (No. 4 kan tih) hawng 75, can 476, chhinsen 54 an man tawh a; alprazolam hi strip 474, ganja kg 5 vel leh methamphetamine mum 108800 an man tawh a, heng an man zawng zawng hi tualchhung rate-ah cheng 3,87,13,000 man hu a ni.
SRS 1st Batch hian kumin April thla atanga July thla thleng a awh a, 2nd Batch hi August thla atangin a intan thung. August thla chhung ringawt pawh hian heroine hawng 20, can 134, chhinsen 18, alprazolam strip 38, ganja pocket 43 an man tawh a, chu chu tualchhung rate-ah Rs. 16,31,650 man hu a ni a, August thla chhunga man hi a pun zel rin a ni bawk. Ruihhlo an mante hi halral a thin a ni a, halral bak chu thuneitute kutah hlan thin a ni bawk.
SRS hian ruihhlo an mana inhnamhnawih hi mi 645 an man tawh a, thuneitute remtihnain home-ah mi 34 dah an ni a, Excise & Narcotics kutah mi 23 leh police kutah mi 17 an hlãn tawh a, mi 282 chu zilhhau hnua chhuah leh an ni.
‘Hawng’ hi heroine tehkhawng lian bera hman a ni a, saranga pack niin chhang fun tiat vel a ni. Hawng khatah hian can 36 a chhuak thei. ‘Can’ an tih chu bur te reuh tê a ni, ‘chhinsen’ an tih chu damdawi bur te reuh tê chhin ang vel hi a ni âwm e. SRS hotute sawi danin, tuna tualchhung rate-ah, chhinsen khat hi Rs. 1000 man vel a ni a, can khat hi Rs. 2500-3000 vel niin hawng khat hi Rs. 60000 vel a ni bawk. Alprazolam hi strip khat Rs. 250 man vel a ni a, ganja pocket khat hi Rs. 50-a hralh a ni tlangpui a, pocket khat hi aieng pack khat nen a inhen. Tun laia damdawi chhuak thar lar em em methamphemine hi mum khat cheng 250-300 vel niin SRS hotute chuan an sawi.
Ruihhlo chi hrang hrangte hi bazarpuiah a hluar ber a, Vanapa Hall kawt leh Aizawl City Park-ah a hluar hle niin SRS 2nd Batch Asst. Convener-te zinga mi Pu Roneihthanga, CEC member ni bawk chuan ZORAM TODAY a hrilh. Pu Roneihthanga chuan, “Aizawl City Park hi ruihtheihthil tih nan an hmang nasa hle a, tihtawp mai pawh a tha zawk hlein ka hria,” tiin a sawi bawk.
SRS hotute chuan, Tuirial leh Rangvamual vela zu zuarte hian ruihhlo an zuar tel fur tawh niin an sawi. Mizoram-a zu dawr hawn a nih hnuah local (rakzu) market nasa takin a tlahniam a, chu vangin local zuar thinte hian damdawi an zuar tel fur nia hriat a ni.
Ruihhlo ngai pakhat chuan, tun hnaia ruihhlo hluar chhoh chhan chu sawrkarin zu a zawrh vang niin a sawi. “Sawrkarin zu a zawrhte hi cheng 20-50 vel lek leka lei theih a awm tawh lo va, pawisa neih ang anga lei theih damdawi lamah an tuan a ni,” a ti a, “Damdawi chu pawisa kan neih tam chuan kan lei tam a, kan neih tlem pawhin tlemtein kan lei thei a ni,” a ti bawk. Chutih laiin Rangvamual vela an zu zawrh chu tun hma aia a that tawh zawk thu, zu in thin pakhat chuan a sawi bawk a ni.
SRS hotute sawi danin, April thla atanga August thla thlenga ruihhlo do nana an sum sen zat chu cheng nuai 4 vel a ni a, petrol/diesel man bakah eirawngbawlna leh an ei leh in atana sênna a tam ber. Hetih lai hian mimal, tlawmngai pawl leh kohhran atangin tanpuina a lut ve reng bawk a, April ni 17, 2015 atanga August ni 19, 2015 thlenga tanpuina pawisa fai lut zat hi Rs. 6,31,450 a ni tawh a, tun thleng hian tanpuina a la luh belh zel a ni.
Comments
Post a Comment