Minister bang leh Office of Profit

ZORAM TODAY | September 1-14, 2015

Tunlai Zoram khawvelah chuan Health Minister Lal Thanzara ban thu hian titi a titam hle a, ‘Office of Profit’ chungchang pawhin khel a hlawh nasa viau. Eng nge a nih chiah, eng chen nge a huam, tih te chu sawi a tam avangin mipui tan pawh a nihna tak hriat fiah a harsa hle a, inhnialna a tichhuak tam hle bawk.

College pakhata Assistant Professor rintlak tak pakhat chuan, “Office of Profit tia India Constitution Article 102(1)(a) leh Article191(1)(a)-a inziak hi Constitution emaw, Representation of the People Act 1951 te hian a hrilhfiahna hranpa a siam lo va, Court emaw, hemi lama thuneitu  Election Commission emaw, President of India-in a hrilhfiah dan azira hman a ni thin,” tiin a sawi a, Office of Profit tehna atana an hman chu “kha pawl atanga hlawh leh ham\hatna a hmuh theih azir leh, a pawl kalphung leh hnathawh dan atang” niin a sawi bawk.

Hmun thenkhatah chuan, miin pawl atanga a hamthatna  dawn hi a hming mai (compensatory allowance) leh a chanvo chelh pawh a hming mai (advisory function)-a chelh a nih chuan disqualified loh mai theih niin an sawi a, chutih laiin Election Commission of India chuan eng post pawh, advisory-a an chelh a nih pawhin ‘Office of Profit’ a ni, a ti ve tlat a. Rajya Sabha member atanga Jaya Bachchan ban a nih pawh khan Chairperson, Uttar Pradesh Film Development Council a nih avanga hlawkna emaw, ham\hatna emaw a chan theih pawh engmah a la lo, tia a tang viau chung pawhin bàn a ni ta tho a nih kha.

Heti khawpa Election Commission of India-in a thîkthu a tihchhiat avangin, tuna minister bâng pawh hian a tihtur diktak a ti niin a lang. Bâng lo ni se, a chungah action lak tho a nih a rinawm bakah hremna na zawk a tawrh a rinawm zawk hle. Amah sawi zawmna pawl/company atang hian compensatory allowance mai aia tam deuh hlawkna chu a hmu ngei niin a lang a, chuvangin hetia banna lo thehluh khalh mai hi thil finthlak tak niin a lang a, a hmanhmawh taka a bàn pawh he thil vang a nih a rinawm.

Mizo mipuite hi kan fing ve tawhin kan thikthute pawh a chhe chho ta hle a, thudik tawk lo leh bumna hmanga hlawhtlin tumna leh eirukna te pawh tun hma ang mai maia en liam kan duh lo chho ta niin a lang a, hmasawnna \ha leh lawmawm tak a ni. Ram hruaitute pawhin thangtharte hi an fingin an huai a ni tih hriain, belhchian dawl leh dik takin rorelna kalpui zel tum sela a tha hle ang.