'Game Changers of the Decade' te zinga thlan Mizo tlangval chu

ZORAM TODAY | September 1-14, 2015

Vanlalruatkima Hrahsel (@Mizohican & Sandman) hi Aizawl Chaltlang veng-a Pu V.L. Rema fapa niin pawl 3 a nih atangin Mizoram pawnah lehkha a zir a, St. Thomas Boys School, Calcutta-a a zir hnuah Montfort School, Tamil Nadu lamah a insawn leh a. School a zir zawh hnuah PSG Tech Coimbatore-ah Computer Science Engineering zir lehin, a zawh hnuah CAT coaching class a kal a, CAT exam a pek hnuin IIM-Bangalore-ah a lut leh a ni. IIM-Bangalore 2nd year a zir kumin UPSC coaching class a kal tan a ni. Chumi hnuah a tuina lam advertising-ah a chhungte phalna ngeia thawkin, Webchutney-ah a lut a, tun thleng hian a eizawnna lamah a la kal tluang zel a ni. Amah Vanlalruatkima Hrahsel chu!

National Games Developer Conference, Pune, 2014

Kum tam tak India rama Digital Advertising Agency changtlung berte zing ami ‘Webchutney’-a a thawh hnuin a thiante nen mobile games development company an din a, a hmingah ‘FITH Media’ tih an vuah. Mobile gaming lama a luhna chhan chu game khelh lam an tui vang ni lovin, India ram hi khawvela smartphone market than chak berna hmun a nih vang a ni. Khawvela smartphone market thatna ber ni chung siin, ‘localized content’ an tih, Indian consumer tan bika games siam a la awm loh avangin kawng zau tak a inhawng nia hriain company an din rãwih mai a, an tisual lo. 

‘FITH Media’-in kum khat pawh a la tlin hmain khawvela start-up accelerator (mahnia company dinte tanpuitu) lian ber pawl ‘Start-Up Chile’ chuan an ram Chile-a kal turin a thianpa nen an sawm a, rokhawlhna dang an neih avangin an kal ta lo a ni. ‘Start-Up Chile’ hian company thar (Start-Up) an tih maite chu cheng nuai 40 chuang a pek mai bakah training a pe thin a, he accelerator/incubator-a tel duhin ram hrang hrang atangin kum tin company thar 1500 chuangin an apply thin a, mahse, batch tinah 100 chauh an thlang thin a, chung zingah chuan Mizo din company ngei chu a tel a nih chu! Hemi tum hian India ram atangin ‘Start-Up’ pahnih chauh an thlang nghe nghe. Tichuan, an company pawhin hma sawn zelin, kum hnih pawh an la tlin hmain India rama company lian tak ‘Jetsyntesys’ chuan an company chu a lei chhawn (acquire) tumin a veh reng a, company dintute leh an company-a investor-te nena vawi tam tak meeting an neih hnuah Jetsyntesys chuan a lei ta a ni.

Hetianga Jetsyntesys hnuaia an tlukluh hian chhan tam tak a nei. Pakhatnaah chuan company an neih hian an investor-te hnenah engtik lai pawha report an pek a ngai a, an senso (expenditure) zawng zawng control reng a ngai a, ‘seed funding’, ‘venture capitalist’, ‘series A round’ tih zawng zawng nen an hna ber, game bawn tak tak siam turin tihtakzetin an hun leh rilru an pe thei ta meuh lo a ni. Pahnihnaah chuan an experience atang leh thil dang dang atangin game chhuak turin idea creative tak pawh nei mah se, hnathawk thei tak tak (man-power) te, hmanrua (infrastructure) bakah talent an neih that si loh avangin awmzia a awm tam lo a ni. Pathumnaah chuan, Jetsynthesys chuan chung an mamawh zawng zawng chu an nei vek a, gaming division thar ‘Playizzon’ an dinah thawktu atan an duh tih an hria a, an thawh châk zawng tak a lo ni bawk nen, Kima pawh chuan he company tharah a thawk ta a.

Nikum, 2014 December thla kha an company thara a thawh tan hun tak ni mah se, company pumpui acquisition tih velah thil tihfel tur neuh neuh tam tak a awm avang leh financial year ending a nih avangin kumin, 2015 March thla khan Mumbai atangin an company inbunna khawpui Pune-ah a insawn ta a ni. He a company zawm thar hian India rama celebrity hrang hrangte digital license an nei teuh va, chungte chu hmang tangkai turin mobile game concept a siam tan ta a ni.

‘Digital rights/license’ chungchang hi han sawi zau ila. Mi tute’n emaw Amitabh Bachchan hi khawlaia bawlhlawh paih that lohzia sawitir lo duh ta se, radio leh print media (newspaper, magazine etc)-ah chuan an sawitir thei mai ang a, mahse, internet (digital) lama ama Twitter, Instagram, Facebook page etc.-a sawitir tur chuan an digital rights neitu company hnenah phalna an dil phawt a ngai. Chuti chuan digital rights/license chu a fiah mai awm e. Celebrity-te digital rights nei turin sum tam tak senga investment tih a ngai thin.

‘Webchutney’ Ad Agency-a a thawh laiin a dawrtu (client) hrang hrangte tan digital campaign a siamsak nual tawh a — Mahindra & Mahindra, Kingfisher, ESPN, Axe Deodorant te tan game a lo siamsak tawh a ni. A thiante nena ‘FITH Media’ company an din khan game pasarih lai mai chu Google Play-ah an publish hman a; an kum khatnaah ringawt pawh khan an game siam pahnih — ‘Nikal Padi: Slumdog Plumber & Pipes Puzzle’ leh ‘Where's My Cat?’ chu India rama gaming ho zawng zawng hruaitulu NGDC (NASSCOM Game Developers Conference)-ah ‘Mobile Game of the Year’ atan an nominate hial a ni! Kum tina ‘game of the year’ an nominate hian gaming company lian lo awm tawh (India Games, games2win, Zapak, Dhruva, Ubisoft etc) te game thar an nominate bak chu company awm thar pahnih khat te game siam a awm ve chauh thin a, anni pawh company awm thar an ni chungin an game siam pahnih ngawt chu nominate a ni hial a; record an siam a ni. Khami tum khan final-ah an game pahnih nominate a ni na a, title erawh an la ta lo a ni. Mahse, All India level-a recognition an hmu nghal kha anni ang company thar tan chuan thil lawmawm leh ropui tak a ni. Recognition an neih hian talent (2D/3D artist, animator, coder, tester, level designer etc) tha ber berte’n an company thara thawh duhin an pan phah thin a ni.

Tichuan, ‘Playizzon’ company thar din turin an sawm ta a, an company pui ber Jetsynthesys chuan celebrity hrang hrangte rights an neih avangin an tan chuan game plan a siam tan ta a. Gaming division ‘Playizzon’ an siam hma pawhin Jetsynthesys hian heng celebrity digital rights hmang hian VAS kan tih, ‘Value Added Service’ ang chi-a caller-tune (entirnan, i phone call i pick up-a Hrithik Roshan or etc. a lo tawng zawt zawt emaw) ang te hi an lo khawih tawh a, sum tam tak lakluhna tha tak a ni ve a. Chu vangin milarho digital rights neih hi a pawimawh em em a ni. He a company thara a thawh hnu hian celebrity hrang hrang Amitabh Bachchan te, Salman Khan te, Sachin Tendulkar te tana game plan a siam mek laiin, hmanni lawk khan Salman Khan-a tan Playizzon anga an game siam hmasak ber chu an release ta a, tunah hian playstore-a download zat hi nuai 5 chuang a ni tawh.

Chhuak hmasa lama kan lo tarlan tawh angin, ‘Bhajrangi Bhaijaan’ an siam kha a hit em avangin SKF (Salman Khan Film) production-ina an movie release leh tur ‘Hero’ atan game siam turin an ti a; Hero hi kum 1983-a ‘Hero’ tih movie lo chhuak tawh chan that leh tur a ni; tunah hian he game bakah celebrity game dang eng emaw zat an siam leh mek (Update: 'Hero: The Official Game' hi playstore-ah download theiha publish a ni tawh). Mak tak maiin, chuti taka vai film/filmstar puala game siam nasa ni chung siin Bollywood film hi a en ngai thak lo nia! ‘Bajrangi Bhaijaan’ pawh kha vawi khat mah a la en lo va, an release ni pawh khan free first class ticket an dawng na a, a ticket chu midang a pe daih!

Mizo zingah game khel nasa leh creative deuh deuh an tam hle a, mahse, sum hmuh nana hmang chu an awm mang lo a tih theih ang! Heng mite hian hmasawn tumin hma lam pan sela, chance an nei tha hle. Amah Kima ngei pawh hian ‘Webchutney’-a a thawh lai khan work experience a nei lo va, an interview laiin amahah theihna a awm tih an hriat khan an la mai a ni. Hetiang company-ah chuan inthlahdah a thiang lo va, a thawk taima leh an hnathawh that dan azirin an kai sángin hlawh an la tam mai a, seniority a awm ve vak lo. Gaming industry-ah hian talent (coding/animation/graphics) mai bakah idea neih that a pawimawh hle a, chumi tur chuan Mizo thalaite hian theihna kan nei a ni.

Kima hi internet khawvel-ah chuan ‘Mizohican’ tia hriat lar a ni a, misual.com enkawltute zinga mi a ni. Blog ziah lamah hian a tui em em a, kum 10 chuang blog a khawih tawh. Mizo blogger ropui ber leh thleng sáng ber tih theih hial tur a ni. A blog-a Mizoram leh North East chanchin a ziah thin avangin kum 2009 khan Tehelka Magazine chuan ‘Game changers of the decade’ (kum 2000-2010 chhunga industry leh platform hrang hranga impact siam nasa ber) te zingah an thlang tawh a. A blog-a a thuziak thinte avangin news agency lian CNN IBN chuan India rama thalai, kum 2020 atana vision nei tha ber 20 an thlan chhuah zingah a tel tawh bawk. Tun thleng hian a blog ‘mizohican.blogspot.in’ chu a la update reng a ni.