Congress Ṭhalai in an pute mawng an hlim: MNYF

Mizo National Youth Front(MNYF) chuan thuchhuah siamin tuhnaia Congress Ṭhalai te'n kawngpui chhe chungchanga Sorkar demna tur an zawng chu an pute mawng hlimna mai niah an ngaih thu an sawi.

ZORAM TODAY|28th August, Aizawl: 
Tun hnai khan Congress Thalai (MPYCC)-in Buichali leh Kawnpui inkar kawng ena sorkar demna tur an zawng hi an pute mawng hlimna mai niin MNF Thalai chuan kan ngai tih sawiin, " Kawng chhe siama sikul khara zirlaite hnatlang te, kawng chhia avanga naupang inkhawmpui kal thei lo te, driver, NGO hrang hrang, kohhran leh mimal leh pawl dang dangte kawng siama kan hnatlan chur churna kha hmanni mai kha a ni a, theihnghilhna hman a la awm lo", an ti a. Chuvangin kawng chungchang hi chu Congress Thalai hi sawi ngam tur an ni lo tih hi MNF Thalai ngaihdan a ni, tiin an thuchhuah chuan a tarlang.

( Congress Ṭhalai kawngpui en)

MNF Ṭhalai chuan, Congress Thalaite kawngpui en, Sairang to Kawnpui kawngpui hi Congress sorkar contractor chuam, ABCI-in a thawh a ni a. He lai kawngpui hi package hnihah then niin a vaia estimate belhkhawm hi cheng nuai 12928.95 a ni a, revised a nih hnuah cheng nuai 17199.47 lai niin kum thum chhunga thawh zawh tura tih chu kum nga chuang fe hnuah pawh an thawk zo hleithei lo a ni, an ti.

MNYF chuan, " He kawngpui hi khatih laia Chief Minister Pu Lal Thanhawla leh a nau PWD Minister Pu Lal Thanzara te contractor chuamte thawh a ni a, sum tam taka revised a nih hnuah pawh an thawh zawh hleih theih loh niin, mipuiin an unau sum siamna ni ngeia an ngaih a ni," an ti a.

(MNF Ṭhalai extended executive meeting)

Hetiang thil a nih avangin he kawng hi tha thei chi ziazang a ni lo va; MNF sorkar thla tlemte chauha upain kawngpui a ngaih pawimawh avangin Mizoram hmun tam takah kawngpui a siam nghal a, Zoram mipuite hi min hriatpuitu an ni, tiin MNF Ṭhalai chuan thuchhuah an siam.

MNF Ṭhalai chuan Congress sorkar laia kawng siam dan dinhmun tarlangin, " Mizoram kawng chhiat em em lai kum 2017-2018-ah khan Congress sorkar khan kawngpui siamna tur cheng vaibelchhe 100 chuang zet neiin cheng vaibelchhe 32 an hmang a, cheng vaibelchhe 75 chuang zet an hmang bang a. Kawng chhe siamthatna (road maintenance) tur pawh cheng vaibelchhe 90 chuang an neihah cheng vaibelchhe 10 zet chu an hmang bang thei a ni. Chutiang khawpa kawngpui ngaihthah an nih avangin, MNF Thalai chuan Congress Thalai hi kawngpui chungchangah sawi tur nei lovah kan ngai a, an tawng tam poh leh an pute mawng an hlim lang chiang ting mai dawn a ni," an ti.