He huna kumthar thuchah sawitu MPCC President Lal Thanhawla chuan BJP sorkarna hnuaiah India ram economy thanna a tlahniam nasa tih a sawi a, state hrang hrangah kan hma lawka MP election kan neih tura Congress thawhpui duhtu, rawn in volunteer party lian tak tak an awm chho zel a, hetiang thil hrang hrangte avang hian Central lamah chuan Congress Party boruak a sang chho zel a, sorkar leh ngei tura beisei leh ngaih kan ni a ti a, "India ram politics insingsa mek hi thlirin, Congress party mite chu phur takin party tan i thawk zel ang u” a ti bawk.
MPCC President Lal Thanhawla chuan MLA Election a Congress party tlak chungchangah tumah dem lo a, puh mawh tur zawng lo turin Congress party mite a chah a, “Ni tha lo atan Pathianin roreltu tur a ruat ve thin tho a, chuvangin kan tana hun ruat hi kan pawm mai tur a ni” a ti a.
“Mizoram a ringtute hian Kohhran kan zah loh chuan zah tur dang kan nei tawh lo. Kohhran lu chu Krista a nih avangin Kohhran hnathawh leh a rorelte hi kan pawm thiam tur a ni a, Kohhran dodal zawngin Congress Party miten tawngkam kan hmang tur a ni lo” tiin party mi kalkhawm hmaah a sawi.
He huna thusawitu dang Health Minister hlui Lal Thanzara chuan MNF sorkarin thisen sawngbawlna man (processing fee) ti tawp a, thil ropui tak ti nia an insawi chu thil ropui tak a ni hran lo tih sawiin, Congress sorkar khan sorkar sum renchem taka hmangin, tlema khawsa thei zawkte lak atang chauhin processing fee a la tih a sawi a. Thisen dawngtu tam tak chuan a thlawnin an dawng char char tho a ni tih a sawi a ni.
Congress Bhavan hawnna hunah hian Congress party hruaitu pawimawh tak tak leh Minister hlui engemawzatin thu an sawi bawk.
Comments
Post a Comment