Kumin atana MPC Party Office hawnna inkhawm hi Pu Lalthlamuana General Secretary-in a kaihruaia, Pi Zokimi MPC Party Women Treasurer-in hunserh a hmang a, MLA thlan thar Pathum ten thusawina hun an hmang.
Pu Vanlalhlana MLA chuan, kum 30 chuang MPC Party-ah nghet taka awmin ram rawngbawl hna thawkin ka lo awm tawh thin a, kan Party chak lo tak leh baihvai taka a awm lai pawha rilru dang pu lo a rinawm taka ka awm tang tang na hi kawng tam taka mipuite khawngaihna leh lainatna ka dawn ve na leh MLA hial ka lo nih theihna hi niin ka hria a, kan Party leh bial mipuite chungah lawmthu ka sawi tak meuh meuh a ni.
He hunah hian Pu VL Zaithanzama MLA pawhin thusawi in, MPC party hian ka phak bak chawimawina tam tak Sr. General Secretary thleng te min pe in, tunah Mizoram rorelna sang ber a thu ve theia min han hlangkai hi ka lawm a, hei tluka he Party a duhsakna dang hi ka tan awm thei ah ka ngai lova, chuvangin Rinawmna, Taimakna leh thawhrimna nen kan ram kan hnam tan I bei zel ang u.
Thusawitu dang Pu Lalsawivunga MLA chuan, MPC Party-ah hian kum 27 zet chu khawi dang hawi miah lo in ka lo awm ve ta a, Kan Founder President-in Six Basic Needs a ngaih pawimawh em em tihhlawhtlina a awm theih na tur hian theihtawp chhuahin hma ka lo la ve tawh thin a, Politics-a ka ngaihtuahna min kaihruaitu ber Six Basic Needs hi hlawhtling taka hlenchhuah a nih theih nan Mipuite thawhhopui ah ka sawm a ni.
MPC Party President Pu Lalhmangaiha Sailo pawhin thusawina hun neiin, kumin 2019 atan Party Organisation tihfel chu kan hna hmasa a ni anga, MPC Party Policy hlamchhiaha a awm avanga kan ramin hmasawnna Economic Development mumal hmuh tur kan la nei lo hi a pawi a, hemi tihlawhtling tura hmalakna hi chak taka kalpui a, nasa leh zuala bei turin MPC Party chuan theihtawp kan chhuah zel dawn a ni, a ti bawk.
Comments
Post a Comment