September thla ral hmaa Tuirini lei chim chhan puangzar turin MNF Ṭhalaite'n PWD Minister Lal Thanzara an phut
MNF Ṭhalaite chuan December 2, 2015 khan Sihhmui leh Lengpui inkara Tlawng lei chu a chim nawn a, a chhui turin khatih laia Aizawl DC Franklin Laltinkhuma ruat niin a kaihhruaina hnuaiah Magisterial Inquiry din ani a, thla hnih chhung lekin February 6, 2016 khan lei chim chhan an chhuina report thehlutin mipui hriat turin an puangzar hman ani, an ti a. MNF Ṭhalai Vice President Lalremruata Chhangte chuan, " Tun ataka Turini lei chim chhan an puang chhuak thei lo bik hi zahthlak kan tiin a mawhphurtu zawng chhuaka hremna pe tura nawrna a awm mek laiin, a mawhphurtu chhui chhuak lova, a mawhphurlotu chauh a chhui chhuak thei hi a mak kan ti hle ani," a ti a. " Amah thlangtlingtu mipuite zahlohna tawpkhawkah kan ngai ani. PWD Minister hian a mawhphurhna a hlen zo hlawl lova, mawhphurhna la ngam ram hruaitu zingah PWD Minister Lal Thanzara hi kan chhiar theilo ani," a ti bawk.
MNF Ṭhalai Vice President chuan, " Aizawl City Convention Center sak tumte'n Upper Khatla, MG Road an laih chim avanga February 16, 2018 a lei dawh hna Sawrkarin a ṭan tawh, June ,2018 ral hmaa thawh zawh tur an pawhsei hnuah an huntiam September, 2018 pawh a ral leh ṭep ta a. Hnathawh kalmek kan en hian kumin chhungin an siam zo hman lo mai ang tih a hlauhawm leh ta hle ani." a ti a. " He kawng hi Aizawl chhim lam châk lakna leh kawngpui pawimawh ber ani a, tin Lunglei leh Serchhip tlangdung pawhtu kawng rinpui ber niin, helai chhehvela cheng sumdawng leh mipuite pawhin nasa takin he harsatna thleng hi an tuar a, MNF Ṭhalaite chuan pawi kan ti a, a hma thei ang bera dawh zawh anih theihnan chak taka hmala turin thuneitute kan phut bawk" a ti.
MNF Ṭhalai hruaitute chuan " PWD a enkawl hnuah vawi tamtak he department hi Zoram mipui mit hmuhah a hmingchhiat pui a, lei vawi tamtak an dawh chim a, nunna hlu tak chan hial te pawh an awm ani. Mizoramah inkalpawhna kawngpui a chhe em em vek a, ram mipuite hreawm taka kan awm laiinan an unauin Zoram mipuite ṭawngkam mawilo tak tak hmangin min tawng ani " an ti.
Lalremruata Chhangte chuan " Kum 2017 - 2018 chhunga kawngpui chhe thawmṭhatna tur Sawrkarin cheng nuai sangkua, zaruk leh paruk (9,606.49/-) a neih zingah kawngpui a chhiat em avanga hmanzawh veka, sum dil belh zel awmtak anih laiin cheng nuai sangkhat, zanga sawmsarih (1570.47/-) lai hman ban pui theitu kan PWD Minister hian engtikah mah Mizote hi kawngṭha min pek theih kan ring zo tawh lova, Mizoramin PWD Minister kan lo neih tawh zingah 'Minister a ngaihna hrelo ber ' ah MNF Ṭhalaite chuan kan puang ani," a ti bawk.
Comments
Post a Comment