Zoram Today: Mizoram Pradesh Congress Committee(MPCC)chuan vawiin august ni 4, Inrinni hian thuchhuah siamin tuin emaw Gauhati High Court-a NLUP dawngtu turte thlan dan dik lo leh thlan dan tur guidelines awm lo ang a Mizoram sawrkar an hek avanga tuna NLUP ṭanpuina dawng mai tur hrek khawtlai a, mirethei tete leirem an rah ve na tur leh nghakhlel taka tanpuina an dawn tur an hrek khawtlai hi pawi a ti tak zet a. Hemi thilah Pu Lal Thanhawla kaihhruai Congress sawrkar tihmualpho tumna leh sawrkar hmai tihmawk tumna biru tak a awm ngei nia a lan avangin NLUP tanpuina sem tih tawp lailawk a ni hi a pawi leh zual a ni, an ti.
MPCC thuchhuah chuan " NLUP dawng thei tur thlan dan chungchang hi NLUP kalpui dan tur a tir te a duan a nih khan duan tel vek a ni a. Hei hi NLUP Manual tia vuah niin internet-ah pawh hmuh mai tur a awm reng a. Hetiang guidelines awm reng chung si a sawrkar hek tuin guidelines awm lo ang leh NLUP tanpuina sem chungchangah thil langtlang lo a awm ni awm taka Gauhati High Court a hrilh hi a vanduaithlak hle ," tiin. "NLUP dawng thei tur guidelines a ziah angin NLUP kalpui hma atang tawh khan Central YMA bultumin khua leh veng tina chhungkua zawng zawng zirchian a ni a. Rokhawlhna engemaw avanga CYMA a tel leh tak loh hnu khan Mizoram University chuan NLUP dawng thei tur endikna hi a kalpui ve leh a. Heng chhungkaw hming list hi NLUP Implementing Board Office-a theh luh vek a ni," an ti.
MPCC chuan " Tuna hekna pawh hi inkaihhruaina mumal a awm reng laia inkaihhruaina awm lo ang a sawi a nih avangin High Court a thubuai awm ang a lang hi awlsam taka chinfel tur a nih avangin miharsate tana programme kalpui hi Pathianin tih tawp a phalin MPCC chuan a ring lo." an ti a.
NLUP kumin a sem tur hnuhnung ber 'Stay' anga an sawi hi High Court-in he NLUP chungchang hi kar 4 (li) hnu-a ngaihtuah leh huna chinfel mai theih tur a nih avangin NLUP hi sem chhunzawm a ni thuai dawn a, Mizoram hmun hrang hranga NLUP dawng tura thlan miretheite lo lungngai lo tur leh chiai lo turin MPCC chuan a chah a ni, tiin an thuchhuah ah tarlan ani.
NLUP semdan chungchangah hian Social activist Vanramchhuangi (Ruatfela Nu) chuan Guwahati High Court ah thil diklo a awm ni a ngaiin Public Interest Letigation( PIL) a thehlut a, Court hian NLUP sem kalpui mek chu kar li chhung atan Congress Party kaihhruai Mizoram Sorkar chu a chawlh tir lailawk(stay) ta ani.
NLUP sem hnuhnung a a dawngtu tur thlang tur hian civil mi thlan anni a, hei hi a diklo ti an tam hle a. MLA bial sawm li a chhungkaw 400 chuang NLUP la dawnglo dawng thar turte thlang tu ah hian MLA leh Sorkar hnathawk pawh ni lo Congress Party worker heng - H. Liansailova, Dr. Lalmalswma Nghaka, Tlangthanmawii, S.Hiato te Mizoram Sorkarin a ruat chu thil diklo takah an ngai ani.
Comments
Post a Comment