ZORAM TODAY — Dt. 21st August, 2018:
Mizo Zirlai Pawl (MZP) chuan tun hnaiah Mizorama 'foreigner' dan lova lut leh luh tum dapchhuah hna a thawk a, mi 200 chuang manchhuah an ni tawh, tih thuchhuah siamin an tarlang.
Vawiina MZP thuchhuah chuan, Assam state-a National Register of Citizens (NRC) an neih hnuah, Mizoram sorkar chuan an ngaihchan anga an chet loh avangin ramri venghim turin an che chhuak ta tih sawiin, August ni 17 leh 18 khan Aizawlah hnam dang thenkhat enfiah an ni a, mi tlem tein hnam dang hmuh remchan theih maite an enfiah chungin foreigner panga hmuh an ni tawh. Vairengte-ah foreigner 16 hmuh an ni bawk., an ti.
Sorkar a mutthluk zel tho avangin August ni 20 (Thawhtanni) zan atangin hmun thumah foreigner dapchhuah hna hi thawh leh a ni a, August ni 21 chhun dar 2:30 thleng khan NRC-a hming chuang lo, Mizorama luh tum foreigner hi Vairengte-ah 127, Saiphai-ah 64, Bairabi-ah 21 dapchhuakin kir tura ngen an ni, tiin MZP thuchhuah chuan a sawi.
MZP-in foreigner an dap dawn tih puangzar lova dap thut ni ta se man chhuah tur eng zat nge awm ang tih te, MZP-in a lo dapna hmun helin mi eng zat nge kal ang tih te, mi tam zawkin foreigner dap hna hi thawk ta se man chhuah tur eng zat nge awm ang tih ngaihtuahin MZP chuan Mizoram hi ven a ngai a ti takzet a, Bairabi te hi kawng chhiat avanga Assam atanga maxi cab service an rawn luh loh lai a ni chungin tam tham tak man chhuah tur an awm tho a ni. Sorkarin ram ven hi tul a ti lo a nih chuan Mizo thalaite'n theihtawp an chhuah a ngai ang tih hi MZP ngaihdan a ni, an ti bawk.
Mizorama dân lova 'foreigner' luh tumte dan hna hi MZP Bairabi Sub Headquarters te, Saiphai-a Hmar Students Association Unit leh MZP Sub Headquarters Vairengte te'n an thawk mek a, Aizawl atangin MZP General Headquarters hruaitute'n an thutchilh bawk.
Comments
Post a Comment