ZORAM TODAY: Mamit, 21/08/2018:
Vawiin khan Chhimveng YMA hall, Mamitah Mamit Central Block Congress Committee Block Conference neih a ni a, heta thusawitu khuallian leh bialtu MLA John Rotluangliana chuan ZPM thawhhona a mumal tawh lo nia sawiin, "Super CM te an ti, vawikhatmah la CM lo kha. Super CM chu Pu Lal Thanhawla hi a ni tih ka puang e," a ti.
John Rotluangliana chuan, "MNF hian kum 15 an opposition dawn tih hre rawh se," a ti a. Tun hmain Congress kum 10 a sawrkar tawh thu sawiin, kha an sawrkar kum tawp 1998-ah khan an tlak tur a chian hle thu a sawi, "Khami tum khan kan tla dawn tih kan chiang a, tunah chuan a dan a dang daih ta mai a ni. Kum 10 kan sawrkar hnuah kan lamah tam tak an lo la lut a, a sawrkar lo MNF lamah mi an beidawng tlat a ni. Pathian khawngaihna leh mipuite zarah kan sawrkar leh dawn," a ti.
NLUP chungchang sawiin John Rotluangliana chuan, "High Court hian min stay loh avangin NLUP hi inthlan hmain kan sem dawn a ni. NLUP hi Congress hian kan atchilh lo a, kan fin chilh tawp mai a ni. Hei aia policy tha hi Zoram politics ah a awm lo a ni. MNF hian a tha lam an tuipui ngai lo a, NLUP te kan sem zel an dal duh a ni," a ti. Minister chuan NLUP chu MNF chuan Congress thal alh thei a ni an tih thu a sawi a, "Mipui tanpuina tur an sem loh dan tur zuk zawng tlat maw le, an sem dawn lo tih khan an lo lawm em em nia maw le," a ti.
Mizoram Institute of Medical Education and Research (MIMER) chungchang sawiin, "MNF MLA te khan 'kan kuhmunah in par' te min ti mai maia an kuhmum lo hrim hrim, kum 1998 kan sawrkar lai khan Referral Hospital atan cheng vaibelchhe 40 kan dawng daih tawha a hmun pawh kan thlang, mahse kan hmang hman loa MNF in an hmanga an tichhe veka Ar vulh nan an chhuaha an kalsan a nih kha. Keinin bul kan tan leha Doctor zirna hial kan din ta a ni," a ti.
Mamit Central Youth Block Congress Committee Conference-ah hian bialtu MLA leh Minister ni bawk John Rotluangliana chuan Congress-ah mi thar 26 a lawmlut a ni.
Comments
Post a Comment