MZP te'n vehbur khawn ṭan; vehbur khawna thawkchhuak zirlaite chungah lawmthu sawi nghal

Zoram Today: Nimin ningani July ni 26 khan MZP General Headquarters bultumin MZP in Bairabi Zophai hmun a Zofate Chawlhbuk sak an tumna a tlawmngai a thawkchhuak Assam Police te'n an vuak leh Silai a an kahna hliam tuar te enkawlna senso leh Assam Police in Zofate Chawlhbuk sa tura mi tlawmngai kal te an tihchhiat sak leh thilbo senso rulhletna tur Vehbur khawn hnatlang chu MZP chuan a chhunzawm.

Nimin hnatlang ah hian college zirlai zathum(300) chuang hnatlang in an thawk chhuak a ni.

Vehbur khawn hnatlang neih hma hian Vanapa Hall kawt-ah huntawi hman a ni a, he huna thusawitu Pu Lalnunsiama MZP Adviser chuan, "MZP in Vehbur khawn a ngai ta hi a pawi kan ti hle a. Assam Police in zirlai pawisawi lo leh Zofate Chawlhbuk sakna a hnatlang mi tlawmngai te kut an thlak a, Silai hial a an kap hi na kan tiin tun thleng hian kan thinlung hi a la dam thei lo a ni. Bairabi Zophai buainaa Bungraw chhia, thilbo leh Damlo enkawlna senso compensation hi Central Sorkar leh Assam Sorkar MZP in kan dil a chhanna kan hmuh loh avangin kan Sorkar hotute thawrawn angin Mizoram Sorkara dil a ni leh a mahse Mizoram sorkarin min pek theih tak loh avangin Vehbur khawn mai hi a lo ngai ta a ni. MZP in Vehbur a khawn ah hian Mizo mipui zawng zawngte zirlai hliam tuar leh thilbo senso rulhna tura thawhlawm lo thawh vek turin kan sawm che u a ni" a ti.

Vawiin zirtawpni July ni 27 hian Vehbur khawn hi chhunzawm leh tur a ni a, chawhnu dar 1:00 atanga tan leh tura tih ani. Govt. Hrangbana College kawt-ah huntawi hman hmasak leh a ni anga Chanmari, Zarkawt, Chaltlang leh Ramhlun area te ah ṭanpuina bawm hi dawh kual leh tur ani ang. Zofate Chawlbuk sak tumna a tlawmngai a thawkchhuak zirlaite damlo enkawlna senso leh thilbo rulh letna tura mi in phal Mizo ṭhahnem tak kan awm leh ṭanpuina tura bawm a sum thlak zawng zawng te chungah MZP chuan thinlung takin lawmthu a sawi ani, an ti.

Vehbur khawna thawkchhuak college zirlai zawng zawng chungah MZP chuan thinlung takin lawmthu a sawi tak meuh meuh bawk a ni, tiin MZP chuan thuchhuah an siam.