Mizoram sorkar lakah MZP te rilru a na; an thiam dan anga hmalak an tum

(L.Ramdinliana Renthlei, MZP President)

Zoram Today: Mizo Zirlai Pawl (MZP) hruaitute chuan  vawiin July ni 21 khan chanchinbu mite kawmin kumin march ni 10, 2018 a Bairabi, Zophai hmuna Pu Ch. Chhunga(L) Ex-Chief Minister-in MZP te ram a pek na hmuna Zofate chawlhbuk sak an tum laia Assam Police te'n MZP mi leh sa bakah hnatlang tura thawk chhuak te tharum hmanga  nasa taka an vuak bakah Silai hial an hmeh puak tih sawi nawnin zirlai leh hnatlang tura thawk chhuak engemaw zat thisen chhuakin hliam tuar tam tak an awm ani, anti a.


MZP chuan hnatlanga thawkchhuakte bakah kan Chanchinbu mite pawh an press card pawh zah lovin vuak tel an ni, an ti a, "Silai mu a kahhliam damdawi In a admit ngai leh zai ngai khawpin an awm bawk a. Assam Police te'n zirlai tlan chhiate umzuiin an riahna hmun bùk a mutbu, pawisa, thawmhnaw, bungbel, cell phone leh document pawimawh tak tak awmnate, Zofate Chawlhbuk sa tura mi tlawmngai thawk chhuakte motor tih chhiat leh bungraw țhenkhat halral a ni" an ti a. MZP chuan heng an halral leh tihchhiat zawng zawngte hlut zawng hi MZP te chhut theih chinah cheng nuai sawmhnih pakhat, singsarih leh zathum (Rs.21,70,300/- ) ani, an ti.

( MZP meeting file photo)

 MZP chuan hliamtuarte enkawlna tur leh zangna dawmna pe tur leh thil bo leh tihchhiatte hmuhlet a nih theih nan  Central sorkar leh Assam sorkar hnenah document felfai tak nen thehluh a nih thu an sawi a. "MZP chuan zirlai hliam tuarte enkawlna tur leh zangna dawmna pe tura kan ngenna tun thlenga Central sorkar leh Assam sorkar ațanga chhanna kan la hmulo hi Mizo hnam min hmuhsitnaah kan ngai ani", an ti bawk.

MZP chuan Mizoram sorkar hotute'n Bairabi Zophai ramri buaina avanga zirlaite thilbo leh chhia zawng zawngte hlutna chhutchhuaka Mizoram sorkar hnenah thehlut tura min thurawn angin leh pek ngei min tiam hnuin rang takin  Asssam Police te'n zirlaite kut an thlak dan Doctor lehkha leh thilbo hlutnate, lirthei an tih chhiat dan zawng zawng MVI report nen lam thehluh nghal ani, an ti.

(File Photo)

MZP President L.Ramdinliana Renthlei chuan, " Chief Minister leh Home Minister pawh sawipui nghal  niin, MZP chuan sorkar intiam anga min pek mai rinna avangin a theih ang angin damlote awmna bill leh motor chhiate chu a ba thlau a siam tir leh in khulh chhuah te ani a, hengte avang hian MZP chuan midangte hnenah pawisa țhahnem tak ba a neih phah nghe nghe a ni." a ti.

MZP President chuan, " Hruaitute thlamuang taka kan awm laiin July ni 19, 2018 (ningani) khan Mizoram sorkar hnen ațangin lehkha kan dawng a Zophai buaina chungchanga thilbo, chhia leh damlote senso zawng zawng min tum sak tura an intiamna chu hlen lovin sorkarin tun dinhmunah pawisa a neih loh thuin min lo chhang ta ani" a ti.

July ni 20, 2018 (zirtawpni) MZP executive meeting chuan Mizoram sorkar hnen ațanga an lehkha hmuh chu ngun taka an  ngaihtuah nghalin thu sawiin, " Sorkarin intiamna an bawhchhia leh Mizoram sorkarin tun dinhmuna pawisa an neihloh thu țawngka pawh nilo, thu dengkhawng tak hmanga lehkhaa MZP hruaitute min chhang hi zirlaite hmuhsitna leh ram leh hnam tana thisen lo chhuah tawhnate chu engahmah a ngailo tihnaah MZP chuan a ngai", an ti a.


MZP executive meeting chuan, " Mizoram chhunga company lian tak tak leh Assam mi leh sa Mizoram chhunga awmte hnenah a rampum angin MZP te'n kan thiam danin sum leh pai khawn mai nise a ti ta a ni, an ti a, a țul angin Mizo mipuite hnenah vehbur khawn bawk nise tiin an rel bawk.

 MZP in vehbur a khawn turah hian ram leh hnam thinlung pu a mahni remchan ang tawk leh phal ang tawk sum leh pai lo thawh ve turin Mizo mipuite leh pawl hrang hrangte thinlung takin MZP chuan a ngen a ni, an ti.


 MZP chuan Bairabi Zophai hmuna Zofate Chawlhbuk sak tumna țhulh a la nih loh thu sawiin Zofate Chawlhbuk sak hi  tum reng ala ni, an ti.

MZP chuan tunah hian ramri chungchangah Chief Minister kaihhruaina hnuaiah Committee sang MZP tel na Core Committee din a ni a, Core Committee hian hma la ve bek bek in, Mizoram leh Assam inrina te pawh 1933 Survey of India Toposheet MAP rin chhanin fan chhuah tawh anih thu an sawi.

" Assam leh Mizoram ramri document kimchang zawng chhuak tura National Archives, Bengal Archives leh Assam Archives te kal hma bak anih thusawiin Core committee-te endikna report kimchang leh document an hmuh chhuah ang te July, 2018 ralhma a Chief Minister hnena thehlut tura tih a ni a, thehlut hman tura hmalakna kal mek chu MZP chuan a hlawhtlin ngei a ringa a beisei bawk a ni. Core committee te hmalakna leh an thu in awmzia a nei lo a nih chuan MZP chuan nasa leh zualin ramri chungchangah hma a la chhunzawm leh nghal dawn a ni, " L.Ramdinliana, MZP President chuan a ti.