MIGLAHSSA in Adhoc School a dah phutin kawngpui dang chat; Zirna ngaihthah vang ani - Dr. Thangtea, Ex - Education Minister. MZP ten CM leh Education Minister hmu nghal
Zoram Today: Mizoram Govt. Lumpsum Higher Secondary School dinna khua Pakuaa Managing Board (MIGLAHSSA) Joint Students' Union, Joint Action Committe te'n Sawrkarin Adhoc Grant-in-Aid a hlangkai tura an ngennaah Sawrkar hnen atanga thu lawmawm an dawnloh avangin nimin July ni 26 ningani zing dar 6:00 aṭang khan heng khaw pakua - Sakawrdai, Farkawn, Zawlnuam, W.Phaileng, Phullen, N.E.Khawdungsei, E.Lungdar, Zobawk, Thingsultliah -a All NGO aṭanga duty insiamin boruak muanawm tak hnuaiah Sawrkar Office, Zirna In zawng zawng khar leh heng khaw Pakuate paltlangtu kawngpui dan (road block) chah a ni a.
" He kan hmalakna hi khawchhung mipuite leh zin vei vakte'n min thlawp ṭha hlein kan hria a, kan ngennate min zah saktu zawng zawng chungah kan lawm takzet a, chutihrualin he Zirna In chang tlung zawk kan mahmawhnate hi min hriatpuia min thlawp zel tur pawn kan ngen nghal bawk a ni" tiin Jt. Students' Union in nimina an thuchhuah ah an tarlang.
Vawiin July ni 27 zirtawpni hian he hmalakna hi chhunzawm leh tur ani a, " Road block ah hian Thingsulthliah khua chuan an khaw chhung mai ni lovin an ram chhung Tuirini ah vawiin aṭang hian kawng an block tel dawn a, Tuirinni lui kaltlanga zin vei vakte'n min lo hriat sak a he kawng dan (road block) hi min lo zawm sak hram turin kan ngen nghal bawk a ni", tiin thuchhuah ah hian tarlan ani.
MZP chuan Lumpsum Grant - In - Aid school te harsatna chungchangah Chief Minister Lal Thanhawla leh Education Minister H.Rohluna te an hmu
Pu H. Rohluna School Education Minister hi Lumpsum Grant-In-Aid school te'n dinhmun sang zawk a awm an phut avanga an harsatna tawh mek leh zirlai zirna an chhunzawm theih loh chungchang sawipui a niin, zirlai thahnem takin an tawrh nasat tawh avanga atul anga ngaihtuah sak tura ngen a ni a. Minister chuan tun sorkar din hmunah Sorkar in sum a neih loh avangin an dinhmun hrethiam viau mah ila, sum harsatna avangin an phut ang hian sorkar in a ti hlawhtling thei rih lo niin MZP hruaitute hi a lo hrilh a ni.
Tin, nimin July ni 26 ningani khan Lumpsum Grant-In-Aid school te harsatna tawh chungchang ah hi. MZP te hian Chief Minister Pu Lal Thanhawla chu a chenna in ah an hmuin an sawipui leh a. Lumpsum Grant-In-Aid school ten dinhmun sang zawk a awm an phut avanga an harsatna tawh mek leh zirlai ten zirna an chhunzawm theih loh chungchang sawipui a niin, zirlai thahnem takin an tawrh nasat tawh avanga atul anga ngaihtuah sak tura ngen a ni a. Chief Minister chuan Lumpsum Grant-In-Aid school ten dinhmun sang zawk an phut hi tihhlawhtlin duh viau mah ila, Sorkar in sum a neih loh avangin Lumpsum Grant-In-Aid school te phut ang hi kan tih hlawh tlin sak thei rih lo a ni, tiin MZP hruaitute hi a lo hrilh a ni.
Hetih lai hian MNF Vice President Dr.R Lalthangliana, Education Minister hlui chuan Mizoram Sorkarin Lumpsum Grant - In - Aid School pakuate'n dinhmun sang zawka awm an phutna leh an harsatna chingfel duhlo ah Sorkar puhin heng school pakuate harsatna hi Sorkar tan thil tih harsalo tak niin a sawi thung.
 |
| (Dr. R Lalthangliana) |
Dr. Thangtea chuan " MIGLAHSSA te'n Lumpsum school aṭanga Adhoc status dinhmun pe tura sorkar an nawrna ah Mizoram sorkarin chhuanlam siama sum awmloh a hmang hi zirna ngaihthah vang ani", a ti.
Education Minister hlui chuan, " Budget a awlsam tawh a, central sorkarin duh duh a hman theihin pawisa a pe tawh a. NEDP leh NLUP ah pawh cheng vaibelchhe tel sum an dah thei a, he thil hi chu ngaih pawimawh loh vang liau liau ani," a ti.
Tunhnaia MNF hruaitute ṭhukhawm chuan MNF sorkar laiin school tam tak Lumpsum Grant- In - Aid , Adhoc status leh Sorkar a hlankai anih thu sawiin Congress sorkar chu Lumpsum Grant - In - Aid school te harsatna chingfel vat tura an duh thu sawiin , school pakuate thil phut avanga zirlaite tawrhna chu pawi an tih thu an sawi ani.
Comments
Post a Comment