PWD leh CYMA in kawng siam chungchangah inremna thuthlung ziak

Aizawl 15th June, 2018 Zirtawpni

By VL Remruatfela

ZORAM TODAY:  Nimin June ni 14 khan Chief Minister’s Conference Hall-ah PWD hotute leh Central YMA hruaitute'n Mizoram chhunga kawng siam chungchangah inremna thuthlung (Memorandum of Understanding) an ziak.

PWD Minister Pu Lal Thanzara chuan PWD leh CYMA ten kawng, lei, insak thlengin thawhhona thuthlung an ziak chu lawmawm a tih thu a sawi a. " Heng thawhhona avang hian kawng quality tha zawk  a thlen ngei ka beisei a, chak taka hnathawh a nih ngei ka ring ani" a ti.

Central YMA President Pu Vanlalruata chuan thu sawiin, "Nikum 2017 YMA General Conference, Zotlang, Champhaia neihah khan agenda-ah Mizoram chhunga inkalpawhna kawngpui tha leh changtlung zawk kan neih theih nan CYMA in hma la rawh se tih a rawn lut a, chumi bawhzuina chuan PWD nen inremna thuthlung ziah a lo ni ta a ni", a ti a.  Kawngpui chu mizo mipuite ta a ni a, PWD in an enkawl a ni tih kan hrethiam tan a ni, a ti a. Ram hmasawnna atan kawngpui tha neih ngei a pawimawh thu a sawi bawk a ni.

PWD Engineer-in-Chief Pu R. Vanlaltluanga pawhin thu sawiin "PWD in NEDP ațanga hnathawhna tura sum hmuh 3% chu lei thuamțhat nan hman a ni ang a, 27% hnathawh kal mek leh PWD hmachhawp hrang hrang te tan niin 70% chu kawng neih sa thuamțhat nan ruahman a ni," a ti.

He hunah hian PWD Principal Secretary Pu Lalram Thanga, IFS, PWD E-in-C Pu R. Vanlaltluanga, Chief Engineer Pu K Sawmvela, Chief Engineer Pu R. Lalrintluanga leh PWD officerte leh hnathawkte, CYMA OB member leh Central Executive Committee (CEC) memberte leh MJA President Pu Zonunsanga Khiangte an tel a ni.

Inremna Thuthlung hian thil hrang hrang a keng tel a,chung zinga thenkhat chu:

1)Awareness Campaign

Hna tan a nih hma emaw, hna thawh laiin emaw Branch YMA he hnathawhna in a huam chin ten tul an tih angin hnathawh dan kalhmang inhrilhhriatna neih a ni ang.

2)Information Board

Project intanna leh a tawpna, a paltlang kawng khuaah information board mumal tak tar thin tur.

3)Inspection & Monitoring

Hnathawh laiin hun remchangah PWD leh YMA ten joint inspection an nei ang. Bialtu MLA leh NGO dangte an sawm thei ang.

Heng bakah hian Contractor te nena thawhho dan tur leh in sa tuten an hriattur Guideline for Road Safety ziahlan a ni.