ZORAM TODAY: MNF Țhalaite chuan vawiin, May ni 22, 2018 khan Sihhmui leh Lengpui inkara awm Tlawng bailey bridge thla khat dawn tlawh theih loha khar mek chu an treasurer Lalzahawma Khiangte hovin a hmunah an enfiah.
Lalzahawma Khiangte chuan, "He bailey bridge hi motor zawh theih lohin khar a lo ngai leh ta a, a hrana lei thar hlak siam zawhna hun ni tawh si, vawiin thlenga hawn theiha peih fel a la nih loh chhan chiang taka mipui hnena sawi turin PWD Minister Pu Lal Thanzara kan phut a ni," a ti a. "Siamțhat leh a nih hnuah pawh an repair lehna chhan chiang tak mipuite hnena puangzar lovin hun rei tak chhung lei zawh thei lova an khar leh ta hian ngaih a tiṭha lo va, hengte hi PWD Minister Pu Lal Thanzara mawhphurhnaah kan ngai a, a chhe lai hmuh mai tur awm si lo heti em ema rei siamțhat a ngaihna chhan sawi chian thuai MNF Țhalaite chuan kan phut a ni," tiin he lei chhawr țangkaitu khawthlang mipuite leh Airport pan țhinte harsatna tawh a nasatzia thu a sawi bawk.
MNYF Treasurer chuan, "Tun Congress sorkar hian lei dawh an mir lo em em mai hi mak kan ti a, he tlawng lei ṭha sa nia ngaih hi a chim tawh mai loh nan țha taka siamțhat a nih a, motor a tlan leh thuai theihna tura țan la turin sorkar kan phut a ni," a ti bawk a ni.
MNYF thuchhuahin a tarlan danin, tun Congress sorkar term chhung hian he bailey bridge hi vawi thum a chim tawh a; October ni 31, 2014 khan a chim a, dawh țhat leh mek a nih laiin December ni 8, 2014-ah chim lehin siamțhat a nih hnua kum khat a ral hmain December ni 2, 2015 khan a chim nawn leh a, nunna chân leh hliam tuar an awm bakah he lei zawhtu khawthlang mipuite leh Lengpui Airport hmangtute'n harsatna nasa tak an tawk mek a ni, an ti.
Comments
Post a Comment