ZORAM TODAY: May ni 19, 2018 (Inrinni) khan rambuai laia Tanhril rama hnam sipai pahnih an kahhlumna hmun chu Ex-MNA Association chuan tlawh chhuakin a hmun an tifai a, Tanhril thlanmual hluia an phumna pawh an zawng chhuak a ni. MNF Ṭhalaite pawhin an ṭawiawm bawk.
September ni 5, 1967 khan Tanhril rama puk pakhata Capt. Lalsanglura, Chaltlang leh Pvt. Lalngheta, Baktawng te chu an ṭhiante nen an awm a. Hemi ni hian Capt. Sanglura chuan a naute pahnih chu Aizawlah chakkhai lam turin a tir a. Aizawla an kal, an let leh lam chu Vaivakawnah kawktuin lo kawkin vai sipaite'n a man ta a.
Vai sipaite hian nasa taka sawisain an dawp a, a tawpah chuan pakhat zawk tuar zo ngang lo chuan a tawmna puk lamah a hruai ta a ni. Vai sipaite chuan puka Capt. Lalsanglura leh Pvt. Lalngheta awm lai chu an kahchilh a. Pu C. Zama'n a sawi danin, "Sanglura hian a thih hmain a tuihal thu sawiin tui a lam a, mahse, zahngaihna nei miah lova kahhlum a ni ta tho a ni," a ti.
An thih thu hriat a nih veleh Sanglura ruang chu Chaltlangah a chhungte'n an la nghal a, Lalngheta erawh chu a unaute an rammut vek avangin a ruang chu Tanhril sikul kawtah zalh a ni a. Chu chu Pi Rosiami w/o Vanlalvuana chuan an inah lain lumenpui a ni a, Tanhril thlanmualah vui a ni ta a ni.
Puk chhunga an ruang latute zinga mi Upa Vanlaldika chuan, "Puk chhungah chuang an lo zalh a. Thiin a bawh nasa hle a, nasa taka sawisak ni ngeiin a lang," a ti. Pi Rosiami, tuna kum 88 mi ni tawh chuan, "Sikul kawta Lalngheta ruang an dah chu ka khawngaih em avangin kan pa hnenah, i la ang kan ti a, kan in lamah kan la ta a. Thisen a bual nasat avangin a rim pawh a chhe hle. Zanah te chu kan in chhak lam aṭangin vai sipaiin ramhnuaimi an rawn sawisa thla a, kan hlau hle a ni. A ruang kan phum hnuah Dawrpui Vengthar lama a chhungte an lo kal a, a ruang kan lo hlawm avangin an lawm hle a, chini te an rawn keng a ni," a ni.
Capt. Lalsanglura hi Assam Rifles aṭanga banga MNF zawm a ni a, nupui fanau pawh nei tawh a ni. Pa lian vak lo, huaisen tak mai a ni. Rambuai hmaa volunteer training te pawh a pe ṭhin a ni. Lalngheta hi tlangval niin palian leh hmelṭha tak nia sawi a ni a, ani pawh Assam Regiment-a ṭang lai, chhuti-a kir leh ta lova MNF zawm ta a ni nghe nghe.
Comments
Post a Comment