ZORAM TODAY : May ni 21, 2018 thawhṭannia Mizo Hnam Run chhung inkhawmah MNF President Pu Zoramthanga chuan MNF party-ah mi 25 lawmlutin thusawina a nei a. Lawmluhte aṭangin Pu Zosangliana Khiangte h/o Dr. Magaret Z.Khuma, Zemabawk te; Pu Herman Sangthankhuma, MPS (Rtd), Zonuam leh Pu James H. Lalchungchunga, Bethlehem Vengthlang te'n thu an sawi bawk.
MNF President Pu Zoramthanga chuan Pu Hawla hian thil hre chiang lo takin thu a sawi mai zel nia sawiin, "MNF chu sorkar leh duh luatah ruahmanna awm lovin district 3 siam belh a, school 400 chuang upgrate-ah min puh a. District 3 kan hawn belh kha MNF High Command-in uluk taka kan thlir hnuah Cabinet Meeting-in ngun takin a bih chiang leh a. District pathum kan hawn kha a thu ringawtin a ni lo va, Cabinet Resolution leh GAD Govt. of Mizoram record thlap a ni a, tunah hian en leh theihin a la awm vek a ni," a ti a. "Țawngkam chauhin district kha kan hawng ve lo va, ruahmanna fel sa vekin kan hawng zawk a ni. Congress an rawn sorkar ta si a, tihpuitlin ngaihna an hre lo mai zawk a ni. An sorkar hmasa tlak dawn a, District thar 5, sum awmsa hauh lova an hawn kha MNF sorkar chuan pangngai takin kan tipuitling vek a ni," a ti bawk.
Chief Minister hlui chuan MNF sorkar laiin sikul tam tak chu Aided School-ah an hlankai thu leh IR .Batallion pa li an hawnbelh thu sawiin " Kan sorkar ang a, tuna mi bak pawh kan la tih belh dawn chauh a, kan hun lai khan zirtirtute hlawh lak theih loh a awm ve ngai lo. IR.Battalion pawh Pu Hawla chuan engmah ngaihtuahna awm lova dinah min puh bawk a. IR.Batallion 4 kan din khan Budget leh thil tul zawng zawng kan ngaihtuahsa vek a, hlawh lak theih loh an nei ngai hek lo. Police Batallion khat pawh din thei lote hian zu an zawrh avangin Police tam tak an boral phah a, Police hna 2000 bawr vel an ti ruak hial a. Pathian leh mipui zarah MNF kan sorkar ang a, Police hnaruakte hi hnawhkhat vekin Batallion thar pawh kan din belh zel dawn. 'Phun phun ula, in phun lungawi a ni mai' tih ang maiin Pu Hawla leh a hote hi kan sorkar laia kan hna thawhah an phun an phun a, anmahni'n hmalakna thar an nei si lo va, 'sorkar hmasa kihhnawk' te an ti thul a, a din hmasatute laka phun phun hi an hna a ni ringawt," a ti a.
MNF President chuan, "Pu Hawla hian sorkar leibat awmzia hi a hrelo niin ka hria, leiba rochun chungchang a sawi fo a. Sorkar leibat (Govt to Goverment) hi chu UT hun lai atanga rawn intan tawh a ni a, kan hun lai khan India rama State leiba nei tlem pathumna kan ni. Keini aiin an sorkar reiin an sorkar ngun zawk a, anmahni leiba hnutchhiah kha a tam zawk daih. Kan hun lai khan saihlum anga nget thei lo leibate kha kan ngai pawimawh a, sorkar hnathawk hlawh te, contract/supply leh Bill reng rengte kha ngai pawimawhin pek theihloh kan nei ve ngai lo. Kan hun lai khan budget kha chawhrualin cheng vbc 525 vel a ni a, tuna an budget vbc 9000 chuang lai a ni tawh a, kan hun lai nen khaikhin chuan a intam hleih hle tawh a ni. Keini chuan budget piah lamah Peace Bonus leh thil dang dangah cheng vbc tam tak development sum atan kan hailut a ni. Tin, Citizen Amendment Bill hi MNF chuan kan duh lo bur a, tih takzetin kan do zel dawn a. India sorkar hian a tihpuitlin loh hram kan duhin kan beisei bawk," a ti.
Comments
Post a Comment