Khiangawia khualzin kawng

ZORAM TODAY | September 1-14, 2015 - Fela Ngente

Kum 1967 a ni a, Thailand rama Yasothon Province-ah chuan loneitu inngaitlawm leh ngilnei tak, taima em em bawk a awm a, a hming chu Yam a ni. An khuaah chuan nula zak thei lo ve tak a awm bawk a, ‘Joei’ tiin an ko thin. Kan hriat awlsam dan tur chuan Yam hi ‘Khiangawia’ kha a ni a, Joei hi ‘Vuani’ tia kan hriat kha a ni! He lemchan hmuhnawm em em hi a thupui chu ‘Yam Yasothon’ a ni a, kum 2005, September ni 8-a an tihchhuah tawh a ni. A hnuah part 2 leh 3 te an siam leh a, tunlaia lar em em hi Yam Yasothon-3 niin kum 2013, August ni 8-a an tihchhuah kha a ni.

Yam Yasothon-3

Hei hi Khiangawia film thar ber a ni a, a thawnthu tlangpui chu kan hre nual tawh awm e. Khiangawia leh Vuani te chu an innei chho ta a, an fate pawh an puitling chho tan tawh. An fapa upa zawk Khiangmawia leh Khiangawia bialnu hlui Neihsungi fanu upa zawk Jawr-i te chu an inngaizawng a, Khiangawia fapa naupang zawk Khiangsata leh Neihsungi fanu naupang zawk Sante-i te pawh an inngaizawng ve bawk. Khiangmawia leh Jor-i te chuan hmun dangah lehkha an zir a, Khiangsata erawh an khuaah a kum 3-na atan pawl 12 a bei leh a, Santei thung chu an school-ah chuan a thiam thei pawl leh mi ngaihsan rawn a ni. An inkara hmangaihna chu tivul zual tur leh a vawrtawp thlentir turin theihtawp an chhuah a. Amaherawhchu, an nu leh pate nulat tlangval lai boruak avangin an chhungkaw hnih chu an inngeih hlei thei lo.

A tawpah chuan inlamsiak hmanga an chhungkaw inkar thu chu chinfel an tum ta a. Khiangawia te chhung chuan ‘Faina Sahbawn’ hmangin hnehna an chang a, an fate duhthusam chu an tihpuitlintir thei ta a ni.    

A changtute

Thailand hmarchhak lam thingtlang nun hlimawm leh ngaihnawm taka chhuah tura ziaktu leh a film-a thil tul zawng zawng buaipuitu hi amah Khiangawia vek hi a ni a, a hming tak chu Petchtai Wangkamlao a ni. A chanchin sawi thui hmain thil dangah peng leh lawk teh ang.

Yam Yasothon 3-a changtu zinga mi Neihsungi kha a tak takah a nupui niin a hming tak chu Endu Wongkamlao a ni a, a film-a a fapa naupag zawk Khiangsata kha a fapa tak tak a ni bawk. A film-a a nupui Vuani kha a hming tak chu Janet Keaw a ni a, ani phei hi chu Santei (Rattiyaphon Phakdilon) leh Jawr-i (Piroonrat Kedkhum) te nen Instagram lamah an inthehlar viau, Mizo zingah pawh follower thahnem tak an nei a, Mizo tawng thumal eng emaw zat an thiam phah tawh nghe nghe. Khiangmawia hming tak chu Likhit Butrprom a ni ve thung a, Pu Kaplinga, Unit President kha Chen Chernyim a ni. An vai hian film star lar tak an ni vek a, Thailand leh Asia ram hmun dang thleng pawha hriat hlawh tak tak an ni hlawm.

An chang thiam hlawm bawk a, Vuani lema chang Janet Keaw hi Thailand National Film Award-ah ‘Best Actress’ nominee a ni ve hial.

Khiangawia hi

Petchtai Wongkamlao hi kum 1965, June ni 24 khan Thailand rama Yasothon Province-ah a piang a, tunah hian a kum 50-na a hmang mek. Fiamthu thiam, lemchan thiam leh film director a ni. Thailand ramah chuan a hming lem (stage name) Mum Jokmok chu a larpui zawk. TV show lamah pawh a lang chamchi a, host/presenter lar tak a ni bawk.

A tirah chuan Bangkok ‘cafe’ scene (Thailand ram restaurant pakhat, live music play-na leh fiamthu thawhna awm nghal)-ah comedian a ni phawt a, fiamthu lam buaipui pawl Jaturong Mokjok din chhovin variety-game show Ching Roi Ching Lan-a a inlan atangin mipui hriat a hlawh chho tan a, a thiante nen fiamthu lam show hrang hrangah an inlan nasa hle. Ama pualin TV Show a nei ta nghe nghe a, a hmingah Mum Show vuahin inrinni zan apiangin an tichhuak thin.

Kum 1994 atangin film hrang hrangah a inlan chho va, tun thleng hian film 25 zetah a inlan tawh. A changtupa bera a channa hmasa ber chu kum 2001-a tihchhuah ‘Killer Tattoo’ kha a ni. Kum 2003-a tihchhuah kungfu thiam hmingthang Toni Jaa channa ‘Ong-Bak: Muay Thai Warrior’-ah inlanin a chanpual a hnehsawh bawk a, mi lawm a hlawh chho lehzual a. Ong-Bak film-a hlawhtlinna a hmuh hnu hian film tur thawnthu ziah leh buaipui lamah a kal nasa chho va, chung a film buaipuiah chuan amah chu changtupa berah a chang zeuh zeuh bawk.

Kum 2004 khan Mizote’n hmuhnawm kan tih em em, billionaire pakhat thah chungchang ‘The Bodyguard’ film-ah changin he action-comedy film hi a hlawhtling hle a, scene pakhat saruaka Bangkok kawtthler hrang hranga tlan kual ngai chu a hit hle a, thenkhatah stuntman (aiawh) hmang mah se khawi emaw laiah amah ngei tlân a ngaih avangin saruakin a tlàn kawi ve zuai zuai mai a ni! Chu thil chu a thil tih tawh azawnga atthlak leh zahthlak ber a nih thu, a hnua an kawmnaah a sawi hial a ni.

Kum 2005-a a channa ‘Midnight My Love’ avangin 10th Pusan International Film Festival-ah a hming a langsar hle a. Thailand National Film Festival 2005-ah ‘Best Actor’ atan nominee a ni nghe nghe.

Mum (Khiangawia) hian ama chanchin tawi ‘The Untold Story’ a ziahna bu chu a tichhuak ve nghe nghe a. Hetia film lama a inhmang nasa viau chung hian a thiante pahnih Pongsak Pongsuwan leh Choosak Eamsuk te nen BBTV Channel 7 variety-game show, Ching-Roi-Ling-Lan ah an la inlan ve reng bawk.

______________

A film siam (direct) tawhte

2004  The Bodyguard

2005  Yam Yasothon (Hello Yasothon)

2007  The Bodyguard 2

2008  Yam Yasothon 2 (Hello Yasothon 2)

2009  Wongkamlao

2013  Yam Yasothon 3 (Hello Yasothon 3)