ZORAM TODAY: ZPM hruaitute chuan vawiin May ni 22, 2018 (Thawhṭanni) khan Ruantlanga ZPM Workers Meet neih chu an hmanpui a, ZPM chief ministerial candidate Pu Lalduhoma chuan MLA inthlan lo awm turah hian, rorel lai Congress chu, inthlan dawn hnaia sum sem avanga inawi nung rual an ni tawh lo, mipuiin an duhtawk tawh niin a sawi.
Pu Duhoma chuan, "Congress thlakna tur mipuiin an dap a, ZPM leh MNF an khaikhin a ni. Kum 10 chhung Chief Minister nia ro lo rel tawh, an hun chhunga hmasawnna te, boruak ralmuan leh ralmuan loh dante kha thlir kir ila. Mizo mipuite hian chul kan rit dawn nge ram thar kan bawh dawn tih kan ngaihtuah a, thutlukna pawh kan siam mek niin kan hria," a ti a, mipuite'n ram enkawltu thar an duh nia a hriat thu a sawi.
Pu Vanlalhlana pawhin thu sawiin, "Zoram mipuite hian eng pawl hi nge ram tan ṭha a, tu hi nge ram hruaitu lu ber atan rintlak tih hi kan hai tawh lo. Mizoram mipuite hi ram rorelna kalphung thar leh hruaitu thar kan hmuak mek a ni. Ṭangrual Pawla tel pawl hrang hrangte hian, ram vei lova hlim taka khawsa thei an ni, mahse kan ram dinhmun an en a, an eizawnnain a tuar dawn tih hre chungin an lo penchhuak a ni. Hei hi hriain party pahnih Congress leh MNF te hian nasa takin min beihrawn ta a ni. An thawkho thei chuang lo ang, hruaitu an inruat thei chuang lo ang, tia min beihna dawtah a chang zo ta a ni," a ti bawk.
Thusawitu dang Pu K. Sapdanga chuan ZPM chuan thuvawn thukphum ‘I ram, i hnam leh i sakhua humhim nan, hmasawnna hna thawk rawh,’ tih an neih thu sawiin, "ZPM hian sorkar siam tul kan tih chhan chu, kan sakhua leh zo nunmawi hi humhim kan duh vang a ni. BJP in tlin teuh an duh chhan chu sakhaw dang leh culture dang nuai bo thei tura danpui siam ṭhat an duh vang a ni. BJP hian MP tam tak nei state te aiin, MP pakhat chauh nei Mizoram hi an enghelh zawka a lan chhan chu Kristianna ṭheh darh a, humhalh kawngah Mizoram hian a thawhhlawk ber vang a nih hmel," a ti bawk a ni.
Comments
Post a Comment