America kan tih mai, United States of America (USA/US) President thlan tur boruak chuan khawvel a tuam chhuak mek a. US Sorkar hi an chak em avangin an President pawh "Most Powerful Man in the World" te pawh an lo ti hial țhin a ni.
US Presidential Election history kan thlir let chuan Democratic Party leh Republican Party te hian President an in neih chhawk ngat ngat tih kan hre thei a. Franklin D. Roosevelt (Democrats)-in kum 1932-1948 chhunga term li (4) lai a chelh hnu khan an ram Danpui siamțha-in mi pakhat tan term hnih aia rei a chelh theih ta loh a ni.
American ho khuan Mizo rilru ang hi an pu ve deuh nge ni, term hnih bak hi chu Party ngai an hrawn țha duh lo khawp mai a. Kum 1952 hnu lam phei kha chuan 1980-1992 chhunga Republican-in term thum an chelh zâwn tih loh chu a khawi Party mah mahin term hnih aia rei chelh an nei ta reng reng lo a ni. 1952 hnu lama President zingah John F. Kennedy (Democrats) 1960-1964, Lyndon B. Johnson (Democrats) 1964-1968, Jimmy Carter (Democrats) 1976-1980 leh George HW Bush (Republican) 1988-1992 te khan term khat țheuh an chelh a. Heng mite hian a mimal ang chuan term khat țheuh chelh mah se anmahni thlaktute kha anmahni Party mi tho an nih avangin a party ang zawng chuan term hnih an chelh tlangpui a nih chu. 1980 Election-ah Jimmy Carter (Democrats)-in a term hnihna tur Ronald Reagan (Republican) lakah a hloh a, Democratic Party-in term khat chiah an chelh. 1988 Election-ah Ronald Reagan-in term hnih a chelh hnu-in Republican Candidate tho, George HW Bush a tling leh a, Republican-in term thum an chelh zawn. Hemi bawr chho tih lohah hi chuan 1952 hnu lamah Party pahnihte hian term hnih zel an inchelh chhawk a ni.
Tunah hian George W Bush (Republican)-in term hnih a chelh hnu-ah Barak Obama (Democratic)-in term hnih a chelh mek a. President thar tur an thlang dawn ta a ni. An inthlan history en chuan tun inthlan hi chu Republican tlin ve hun a tih mai theih.
Amaherawhchu Republican Candidate, Donald Trump hi a țawngkam a bawlhhlawhin Muslim te huatna a chhakchhuak nasa a. Hei hian America mipui, hnam hrang hrang te karah chi leh chi inthliarna leh inhuatna a thlen ang tih hlauhthawnna lian tak a thlen mek a ni. A khingpui a beih danah lah "Setana" ti hial te'n a ko thùl. Heng te avang hian puitling lo riau leh mi buluk-a ngaitu leh amah support lotu American mipui-ah leh anmahni party Republican hruaitute ngeiah pawh a nei ta nawk mai a. Chutih laiin Democratic Party Candidate, Hillary Clinton hi President hlui Bill Clinton-a nupui, kum eng emaw zat White House lo luahlum tawh, Secretary of State hial ni pha, a pasal a uire lai pawha chhel tak leh chak taka awm thei a nih avang hian mipui ngainat a hlawh viau niin a lang si.
Chuvangin Republican tlin kum ni tura ngaihah hian Democrats lam hi an tlin theihna chance a sang viau niin a lang. Kumin inthlanah hian Democrats hi lo tling ta se, term thum an chelh zawn dawn tihna a ni. New era in US Presidential Election chu kan hmu thei ang em? I lo thlir ang.
Comments
Post a Comment