ZORAM TODAY | March 1-14, 2016
Tunnlai Zoram titi lian ber chu Chakma issue a ni awm e. Dân lova Chakma khaw din nia sawi, Tuichawngchhuahah primary school a kâng a, boruak a rawn alh chhuak hluai ta mai niin a lang.
Chakmate hian kum 1872-ah Mizoram leilung an rap tan a, Autonomous District Council an neih hnuah an pung thur thur a, hei hi Bangladesh atanga dân lova lo pem lut an tam vang a nih a rinawm. Heng mite hi mi tam tak chuan ‘Chakma tih hi an hming inphuah chawp a ni a, Takam tih tur’ an ti kher thin.
Tun hma atangin Chakma issue hi a awm ta zeuh zeuh va, a bikin zirlai pawl lian pahnihte hian an buaipui nasa bik hle. CYMA pawh thangharhin Bangladesh foreigner chhiarpui (Chakma chhiarpui) neih tumin hma a la chho ta zel a, a lawmawm hle. Zirlai pawl leh tlawmngai pawlte hian kan ram hruaitute hnu pawr an chul mam zat zat loh chuan a ram pum mualphovin kan mualpho reng dawn tih a hriat reng mai.
Sawrkarin tih tur a tih loh hian mipuiin tih loh tur an tih a ngai thin. Chakma chungchangah pawh hian sawrkarin a tih tur a ti lo va, a tih loh tur a ti thin tih a hriat. Tuna Tuichawngchhuahah pawh hian ration card te pek an ni a, NLUP pek an ni a, tui leh êng pek an ni a, zirna tha tak pêk an ni a, vote pêk an ni bawk. Dân lova khaw din ni si heti fakauva sawrkarin a duata a ngaihsak hi a mak takzet a ni.
Chakmaho hi Mizoramah chuan hnam tenau zawk an ni a, an aw hi sawrkar laipui pawhin a ngai pawimawh bik hle. Chumi hre rengin pangchan an chhuah a, anmahni duata ngaihsak em emtu sawrkar bawk hi buainaah a luhtir thin. Kan ram hruaitute lah chuan, harh tang e tih suh. Bum fin theih loh hruaitu kan nei ni te pawhin a lang. Kan politician-te hian ram an hmangaih hlawl lo a nih pawhin hnam dang lakah kan ram neih chhun hi hralh lo se a duhawm hle ang.
Mipui vaupung chauh tinate pawh hi dem theih an ni bawk. Social media-ah na tak takin an inhrosa a, ‘that ila ni mai lawm, vawhlum ila ni mai etc.’ te hi an tawngkam chhakchhuah duh zawng a ni. Mahse, a taka chet chhuahnaah chuan chung mite hmel chu khawvar lam arsi ang pharh a ni thung. Ram hruaitute leh an hruai mipuite hi kan inhmeh tâwk viau a, hmasawnna leh harh tharna ken neih a ngai tak meuh meuh a ni.
Comments
Post a Comment