6.2.2016: Zaithiam lar tak ni țhin Liandailova Chhangte, kum 57 mi chu tukin dar 4:30 khan a room bul varanda ațangin a chesual a, rang takin Aizawl Civil Hospital panpui ni mah se, chhan hman a ni ta lo. Amah hi cancer treatment la mek lai niin Chaltlang Dawrkawn-a khawsa a ni a, vawiin chawhnu dar 1-ah Rev. Lalbiaknia'n a vui ang.
Liandailova Chhangte hi Pu Vanlalvena leh Pi Lalțhuami te fa niin October ni 22, 1958 khan Serkhan-ah a piang a, unau 6 an ni. Kum 1976-a Aizawl College-a an kal laiin zai leh rimawi lamah a inhmang nasa hle a, kum 1977-a College Singing Competition neihah Mizo leh English hlaah pakhatna a lo ni ve ve tawh nghe nghe.
College a kal lai, kum 1976 khan khatih laia musical group lar tak The Messengers Band chu a zawm ve a, Joseph Zokunga, Hnema (Hrangchhuana Pharmacy), Ngurbiakthanga h/o Vanlalruati leh Laltlanchhungi Pachuau te nen an lo zaiho tawh țhin. Hemi kum vek hian musical drama Down To Earth tih chu mipui hmuhah thiam takin an chang a, kum 1977-ah Prodigal Son tih chang lehin mipuiin an hlutin an lar phah hle. Hetah phei chuan fapa tlanbo lemah a chang a ni.
Hemi kum, 1977 khan All India Radio-ah hla a thun țan a, Phengphe Nunnem, Nunhlui liam hnu leh Tawnmang mawl an chang zo ta tih te a ni a, a lar hep hep hle. Kum 1980 khan audio album a buatsaih țan a, chung zingah chuan Zan lalnu, I her dun ang leh Chung muvanlai te a tel. Chumi hnuah Lengzem Vol-II tichhuak lehin gospel album a siam zui leh a. Chung a album-ah te chuan Duhlai, Chung muvanlai, Kros pangpar, Zan lalnu, I her dun ang, Suihlung lentu, Bahsam sei hniangi tih leh Min hrilh rawn zaninah ngei tih te chu Zoram dung leh vangah a lar em em a ni.
Liandailova Chhangte hian audio album 4 a siam hman a, AIR-ah hla 70 chuang a thun tawh a, B High Grade a ni nghe nghe.
Comments
Post a Comment