ZORAM TODAY | November 17-30, 2015 - Fela Ngente
AMC inthlan a hnai tawh hle mai a, candidate zingah thalai, la naupang zawk tak takte hmel pawh a lang nual mai. Mizo thalaite hian eng ang chiahin nge kan ram politics-ah hian hmun kan chan a, eng ang chiahin nge ring kan rawlh ve chu a hretute theuh kan ni awm e. Khawvel ram dangah hian thalaite hian eng ang takin nge an ram inrelbawlnaah ring an lo rawlh ve i’n thlir thuak teh ang.
Proscovia Alengot Oromait
Kum 19 mi chauh a nih laia 2012-a Uganda Parliament member atana thlan tlin Proscovia Alengot Oramait hi January ni 1, 1993 khan a piang a, Usuk County, Katakwi District atanga thlan tlin niin National Resistance Movement (Party) aiawh a ni a, Uganda ram mai ni lo, Africa khawmualpui pumpuia Parliament Member naupang ber a ni a, tunah hian kum 21 mi chauh a la ni! A tlinna bialah hian a pa Michael Oromait (RIP) chu July ni 21, 2012 thleng khan M.P a lo ni tawh nghe nghe.
Proscovia hian a pa hniakhnung zuiin environment, hriselna (health policy), mipa leh hmeichhe intluktlanna (gender issue) leh zirna (education) chungchangah hma a la nasa hle a, high school a zawh hlim hlawta thlan tlin a nih avangin tunah hian Uganda Christian University-ah Mass Communication Department-ah a inziak lut leh a, theihtawpa zir zawm zel a tum.
A naupan lai chuan an ram president nih a châk hle thin a, M.P atana thlan tlin a nih tâkah chuan a naupan avanga sawichhiatna a tawk nasa hle a, nimahsela, chu lam chu en lovin an ram tan theihtawp chhuah chhunzawm zel a tum zawk a ni.
Uganda ramah hian thalai an tam hle a, 50% chu kum 15 hnuai lam an ni a, 78% chuang lai hi kum 30 la tling lo an ni bawk, mi thiamte chhut danin an ramah hian politician naupang tak tak an la awm belh zel dawna rin a ni.
Anton Amadé Abele
Kum 18 mi chauh a nih laia Swedish Parliament member ni tura thlan tlin Anton Amadé Abele hi kum 1992, January ni 10 khan a piang a, politics-a a tui chhoh dan hi a ngaihnawm viau mai. 2007 kuma Stockholm khawpuia party (intihhlimna)-na hmuna thah Riccardo Campogiani (kum 16) chungchang avangin facebook-ah khawlaia intihbuaina leh tualthahna duh lohzia lantirna group ‘Bevara oss från gatuvåldet’ (save us from street violence) siamin member sing chuang an awm nghal thuai a, a hnu lawkah helam hawi program hi a siam chhunzawm bawk a, nasa taka thawkin awmze nei zawkin hma a la zel a, kum 2007 khan Munich khawpuia MTV Europe Music Awards sem tumin ‘Free Your Mind Award’ (Human Rights lama thawk thate dawn chi) a dawng nghe nghe.
2010 a Sweden ram General Election neihah Moderate Party aiawha dingin Culture and Sports Minister ni lai Lena Adelsohn Liljeroth chu Stockholm Country bialah a khing thla nghal hial a, hetih lai hian kum 18 mi chauh niin Sweden rama M.P naupang ber a ni.
Kum 2014 general election-ah erawh a ding zui ta lem lo va, M.P a nih hmaa a hmalaknate chu Parliament member ni chung chuan tih chhunzawm harsa a ti deuh niin a sawi. Zalen taka human rights lama inhman chhunzawm leh chu a duhthusam ber a ni.
Alex B. Morse
Halyoke khawpui, Massachusetts, U.S.A-a Mayor naupang ber ni tura thlan tlin Alex B. Morse hi January ni 29, 1989 khan a piang a, neih inangte zalenna taka an inkawp theihna rama cheng a ni bawk a, amah hi tuai/pherh (gay) a ni a. April, 2015 khan a mipatpui Edwin Cruz Vargas, engineer tlangval nen an inhual nghe nghe.
Kum 2011 khan kum 22 mi niin Mayor atan thlan tlin a ni a, Mayor ni lai Elaine Pluta a khing thla a ni. Kum 2013-ah thlan nawn leh a ni bawk. High School a kal lai atang tawhin LGBT (Lesbian, Gay, Bisexual, Transgender/Tuai leh patil zalenna) chungchangah nasa takin a lo campaign daih tawh a ni. Thlan tlin a nih chiah hian an khawpui economic dinhmun siamtha turin nasa takin hma a la nghal a ni.
Wyatt Beau Roy
Australia rama Liberal National Party of Queensland (LNP) mi leh sa Wyatt hi kum 1990, May ni 22 khan a lo piang a, Brisbane hmar lama Strawberry huan (firm) a seilian a ni. Melbourne-a La Trobe University-ah te, University of Queensland-ah te lehkha zir thinin Political Science leh international relations subject tuipui em emtu a ni.
Kum 2010 Australian House of Representatives inthlanah thlan tlin niin Australian Parliament member naupang ber a ni. September, 2015 khan Assistant Minister for Innovation atan ruat a ni leh bawk a, kumpinu ram chhung (commonwealth)-a minister naupang ber (Kum 25) a ni nghe nghe. Ani pawh hi neih inang inkawp (same sex marriage) thlawp tlattu a ni a; Parliament rorelnaa Conscience Vote (Party-in a tihbuai loh, mahni chhia leh tha hriatna hmanga thuthlukna siam) duhtu a ni bawk.
Comments
Post a Comment