ZORAM TODAY | November 17-30, 2015 - Kimi Colney
.jpg)
Frank Abagnale Jr. hi April ni 27, 1948-ah New York-ah a piang a, unau pali zinga a naupang ber dawttu a ni. Kum 14 a nihin a nuin an in a chhuahsan a; hei hian a nun a nghawng thui hle. An chhungkaw nunphung pawh thui tak a tibuai a, a pa chuan a nu a la hmangaih em avangin a tuar thiam lo hle a ni.
He an chhungkaw thil thleng hian Frank-a nun a khawih danglam hle a, a khua a har em em a, nunkawng dik lo lam a zawh tan ta a. A hnathawhnaa hman turin Frank-a pa hian, truck leh gas station-a hman tur credit card a kawltir a. A bialnu lên chhuahpui nana pawisa a mamawh avangin, he credit card hmang hian gas station, petrol lakna hmunpuiah chuan car part hrang hrang, tyre leh battery te a lei a. Heng a thil leite hi dawr neitute hnenah pawisa tlemtein a hralh let thin. Chu chu dawr neitute pawhin an zuar chhawng ve leh a, an tan pawh hlawkna a ni. Mahse, a pa’n a credit card bill a han hmuh meuh chuan US dollar 3400 chuang daih a lo ni a, a man chhuak chiang hle.
Chutih lai chuan kum 15 chauha upa a ni a, a pa chu a lungawi lo hle a, private school-ah a dah nghal a. Chumi hnuah kum 16 mi lek a nihin an in a chhuahsan ta a ni. A hma lam hun atan a inngaihtuah nasa hle a, eizawnna tur dapin a inngaihtuah buai nasa hle. Chumi hnu lawkah, awlsam taka eizawn dan a hre ta a.
Account hrang hrang a siam a, bank check copy a tak ang chiah chiah a siam chhuak a, heng hi mi account-ah thunsak tur anga insawiin, a ziah ang zat a dil chhuak leh thin. Bank atanga a sum lakluh dan dang pakhat chu, deposit form ruak (blank deposit slip)-ah ama account number a ziak a, slip dangte zingah a rukin a dah a, kha bank-a pawisa thun turte khan Frank-a account-ah an lo thun ta daih thin. An man chhuak dawn hnai nia a hriat veleh chu a thil tih chu a chawlhsan nghal a ni.
Hei hi, dik lo taka sum lakluh a tanna a ni awm e. A che bawra chho telh telh a. Reilote hnuah pilot-ah a tang leh thei ta mai a! Hei hi a chhan ber chu, a thlawna khawvel hmun hrang hrang tlawha kal a châk vang niin a sawi. A risk a sáng ve hrim hrim a! Vawi khat mah van sanga thlawhnaa la thlawk ngai lo chuan Pan American World Airways chu a call a, an pilot nia insawiin a a pilot uniform a tihbo thu a sawi a, airways lam pawhin a thar lakna tur an lo hrilh a; ID lem leh FAA license lem siamin a va lam a; pilot a ni der!
Kum 16 atanga kum 18 a nih chhungin Frank hi km 16,00,000 zet a thlawk hman a, thlawhna 250 hmangin ram 26 zet a tlawh hman a ni! Hemi kum hnih chhung zawngin pilot tak tak emaw an tih vek avangin a kalna apiangah thlenna leh ei leh in a thlawn vekin a la dawng zui!
A duhtawka a thlawh kual hnuah, buaina a tawk hnai niin a hria a, a pilot lemchan chu a chawlhsan a, Georgia state-a Atlanta-ah a kal a; hna tha tak dang a va thawk leh nghal a! Hospital library-ah a inchhiar a, he hmun Georgia Hospital-ah doctor angin a awm nghal hmiah! Hei hi a chhan pawh, a in luahna tur application a dahkhah lai in hnathawh ziahna turah ‘doctor’ tih a ziah vang a ni. Hospital-ah chuan intern supervisor angin a awm a; damlote a khawih vak loh avangin harsatna em em a tawk lem lo. Amaherawhchu, ni khat chu a thil tih avangin naute damlo pakhat chuan a nun a chân phah tep a. He thil thleng atang hian doctor-te kuta mihring nunna innghah nasatzia hre chhuakin, a doctor lemchan chu a bansan ta a ni.
A la duhtawk lo! Hemi hnu hian Louisiana-ah Harvard law degree lem siamin lawyer ni tura an tlin leh tlin loh tehna bar exam-ah a inziak tling hlauh mai a, he hmunah hian lawyer hna a thawk nghal a ni; hetih lai hian Frank hi kum 19 chauhva upa a la ni nia! Attorney General corporate law division-ah hna a thawk a, hetah hian Harvard University atanga zir chhuak ngei hna thawk a awm bawk a. An zirna lam thu vel a zawt thin a, lut tak tak ni ta lo chuan Frank-a chuan a lo chhang thei mang thin lo va. Thla 8 a ral meuh chuan a thawhpuipa chuan a chanchin chhui a tum tih a hria a, a hna chu a bansan leh ta a. Hemi hnuah hna hrang hrang thawk zuiin zirtirtu-ah te pawh a tang a; Utah-a Bringham Young University-ah semester khat zet chu naupang a zirtir hman!
A khawsak dan chu dan kalh a nih miau avangin, a tawp a tawpah chuan man a ni ta a. Kum 1969-ah kum 21 a nih laiin, pilot lem a chan laia a bialnu chuan hêkin man chhuah a ni ta a. Thiam loh chantir a nih hnuah France rama Perpignan khuaa lungin hrehawm taka tantir a ni.
Dan kalha a khawsak dan hian ram 12 ngawt a nghawng tel tak avangin ram hrang hrangah a tâng kual a, a tawpah USA-ah kum 12 tâng tura thawn a ni ta a. Hetah pawh hian thlawhnaa an kal dan tur an buaipui vel laiin a tlan chhuak leh hram a, Sao Paulo, Brazil-a kal tuma ticket counter-a a din laiin an man leh hlauh a ni.
Vawi khat mai ni lovin vawi hnih ngawt mai chu lungin atangin a tlan chhuak a. A vawi hnihnaah phei chuan prison inspector, lungin tâng anga awm der angin a insawi a, an la awih mai zel a! Mahse, rei lo te hnuah an man leh ta tho va.
Kum 12 lai tâng tur ni ta chu, a hma lam hun thim hle niin a lang a, mahse, a vanneih a la kal tluang zel a lo ni. Kum 5 pawh tling lo lungin a tàn hnuah US Federal government chuan, amah Frank-a anga mi buma eizawngte manna kawnga FBI-te pui tura a intiam theih chuan chhuah a nih tur thu an sawi a, chu thu pawmin lungin atangin a chhuak ta a ni. Hetih lai hian kum 26 mi chauh a ni a, lungina a chhuah hnuah kum 35 chuang zet chu FBI-te a tanpui zui a ni.
Hna te a hmu a, tha takin thawk thin mah se, a nunhlui an hriat chuan an bàn zel a. A beidawng thei hle. Ni khat chu bank-ah kalin, “Darkar khat hun min pe ula, ka thusawi hi manhla in tih loh chuan engmah min pek lo ang a, tha in tih erawh chuan dollar 500 min pe dawn nia,” a ti a. Tichuan, a thil lo tih thin dan atangin bank hnathawkte tana tangkai tur leh misual laka inven dan turte a sawi chu, ngaihthlak manhla an ti ta em em a. Chuta tang chuan rawn lar chho zelin, tunah hian Abagnale & Associates company, fraud (inbumna) lampanga company dangte tanpuina chu a din tawh a ni.
Frank-a nunah hian zirlai pawimawh tak pahnih a awm. Pakhatnaah chuan, kan hun kal tawh chu kan hun lo awm zel tur nghawng buaitir loh hi a ni. Ram 12 laiin misuala an ngaih, khawvel hmun hrang hranga mi tam tak bumtu, dollar maktaduai hui thei Frank Abagnale-a’n vawiina nunphung pangngai zawha hlimna leh hlawhtlinna a neih theih chuan keini pawhin kan thei. Mi zawng zawng rin a hlawh tawh loh hnuah, mi zawng zawng rin hlawh turin a rawn invawrh chhuak leh thei hi a entawntlak em emna pakhat chu a ni.
Frank Abagnale-a nunah hian mi pawimawh tak, nunphung pangngai a zawh theihna tura puitu a awm a, chu chu FBI Agent, Joseph Shea a ni. Mi zawng zawngin an rin loh laiin Joseph Shea chuan kawng dik zawk a zawh theih nan theihtawp a chhuahpui a; Joseph Shea thih thlengin thian tha tak an ni zui nghe nghe. Joseph Shea thilt tih atang hian, mi zawng zawngin misual ber nia an ngaihte hi mi tha berah an chhuak leh thei tih a lang chiang hle.
Frank Abagnale Jr. hian a chanchin ziahna ‘Catch Me If You Can’ tih lehkhabu chu kum 1980 khan a tichhuak tawh a, chu chu film siamtu lar Steven Spielberg chuan kum 2002 khan a film-in, a bu hming ngai puin a siam a, Titanic-a a changtupa Leanardo Di Caprio-in a chang nghe nghe. Tun thleng hian inbumna laka invenna programme a siamte chu company hrang hrang leh financial institution 14,000 chuangah an hmang tangkai em em a ni.
Tunah hian South Carolina-a Charleston-ah a nupui fanaute nen an khawsa mek a, a fapa pakhat chu FBI-ah hna a thawk nghe nghe.
Comments
Post a Comment