ZORAM TODAY | October 20-2 November, 2015
October ni 1-3, 2015 chhung khan Lengpui Mini Sports Complex-ah Tourism Department-in an buatsaih thin Anthurium Festival chu neih a ni a, he festival hi Mizoram larsap Lt. Gen. (Rtd) Nirbhay Sharma chuan a hawng. A hawn ni-ah hian khuallian chuan, Anthurium Festival leh Bamboo Day chu khualzin tam zawk hîp luh nana a that thu leh state pawn lam mi a hîp tam telh telh a rin thu a sawi a, a khar ni-ah hian Tourism Minister John Rotluangliana chu khuallian a ni bawk.
ZORAM TODAY chuan he festival, ni thum awh chu a hmunah a tlawh a. Khua a lum hle a, khualzinmi hmuh tur an awm lo va, MLPC Act 2014 bawhchhiatna a nasa hle a, minister te ngei pawhin dân an bawhchhia a ni. Langsar leh ualau taka sapzu lek vá vâ hmuh tur an tam hle a, rui nu phût an tam a, police duty-te bula kal pai tuang tuang tawk lah bo lo. MLPC Act 2014 chu lekkawh a ni ta lo em ni aw, tih theih a ni.
Sawrkar phalnaa zu zuartu MIFCO chuan beer a hûng chhuak a, hmun hnih hmun thum laiah duh duha lei theih turin pho chhuah a ni. Naupang atanga puitling thlengin an duh zat zat an lei a, an lek chhuak a, liquor card tel lova phalrai a ni.
Kût hmanna mual chhim lamah intihhlimna (festival) buatsaih a ni a, he intihhlimna hmuna item chi hrang hrang- card den, nghakuai hmanga thil khai, vawm fuh leh a dang dang a awm a, heng item thenkhatah lawmman atan beer an hmang a ni. Stage sir chhim lam deuhvah lehkhaah zufang lei tur a awm thu ziakin an lo tar.
ZORAM TODAY-in a tlawh lai hian Pick Up (207) eng emaw zatin load khat tlatin beer a rawn phurh luh belh a, a zawrhna bul vel a lûn hle a, hralh a tla cher cher hle. Bawlhhlawh bawma thil awm tam ber pawh beer bur ruak a ni. Hetih lai hian hmun tinah police duty an awm reng a, tâng phur motor pawh a ding a, a ruak thung.
Mizo thalaite, a bikin Aizawl khawpui thalaite’n he kût hi an lawm hle a, Lengpui khaw chhungah traffic a jam nasa hle. Tlai tak thlengin kût hmanna hmun pan an awm reng a, haw lam nen an insulpel zut zut a. Hmun thenkhatah an lo intibuai luih luih a, an lo insual a; hmun thenkhatah inhaw lo em emin an lo fianrial thung a! Thalai zinga beer leh zu ruite’n nuam leh hlim takin an hmang niin a lang.
Programme a rei a, kûtna hmun atanga haw hi chhun atangin zanlai dar 1 thlengin an awm! Kum dang ang bawkin accident an thleng leh nual a, nunna chân phah pawh an awm leh ta. Aizawl Civil Hospital Casualty a lûn hle a, zan rei tak thlengin mi an awm luih luih a. Case tam zawk hi Anthurium Festival hmang haw, accident an nih thu, duty-te’n an sawi a ni.
He festival, ni thum chhung an hmanah hian zaithiam tam tak an zai a, lam thiam te, cultural show hrang hrang entir a ni bawk a, pipute nun dan pawh lantir a ni bawk. Cultural dance-ah hian Mizo ni lo, Gorkha Cultural Troupe leh Chakma Cultural Troupe-te pawhin show an nei a, Mizo ni lo an nih avangin hei hian sawi a hlawh hle a ni.
Anthurium Festival hi kum 2006 atang khan Tourism Department buatsaiha hman tan a ni a, Reiek-ah hman thin a ni. Kuminah erawh kawng a that loh avangin Lengpui Mini Sports Complex-ah hman a ni. Kum dang zawng aiin khualzinmi hmuh tur an awm lo niin a lang a, ZORAM TODAY-in a tlawhnaah khualzinmi hmuh tur an awm lo. He festival hman nan sawrkar laipui chuan cheng nuai 25 a rawn tum a ni.
Comments
Post a Comment