Mizo thalaite chotu Indian Army Officer nula Lt. Babie Lalduhsangi

ZORAM TODAY | October 6-19 October, 2015

Tun hnaia Mizo nula chhuanawm berte zinga rawn inhlãngkai Lt. Babie Lalduhsangi chu a training zo chawlh hmanga a lo haw zawk lai kan kawm thei hlauh mai a, sipai officer a nih chhoh dan leh a chanchin hrang hrang kan zawt a, hun tha tak min pek avangin a chungah kan lawm takzet a ni.

Babie Lalduhsangi hi kum 2014 October thlaah Officers’ Training Academy (OTA) Chennai-ah a lut thla a, hetah hian mipa leh hmeichhia training pawlh vekin inelna hrang hrangah mipa leh hmeichhia an thliar hran lo! A sam sei mawi em em mai chu mi dang rualin an nawr kawlhsak vek a. An training chhung hian harsatna zawng zawng hneh dan an zir ni berin a lang. A chang chuan darkar 3 chauh te mutna hun an nei a, mel tam tak tlan te a ngai a. Hriatna tizau turin zirna lam an bei reng bawk. Thla 11 an intuaihriam hnuah kumin 2015 September thla khan an zo (commissioned) ta a,  hetia an zawh hian Lieutenant (arsi 2 bel) puitling an ni ta a ni.

Sipai officer ni tura an training chhunga an intihsiakna hrang hrangah Babie-i hi a chungnung lawr lak a, Best in Endurance (Tuarchhel ber) lawmman dawngin a training-pui mipate ai pawhin a tuarchhel zawk. Best in Games and Sports (infiamna lama titha ber) lawmman a dawng a; hengte bakah hian — Best in Outdoor Training, Judo Gold Medalist, Judo Best Fighter, Merit Card leh Blue Card (infiamna avanga chawimawina sang ber), senior entawntlak ber (an junior-te thlan), km 25 tlan (kg 35-a rit leh rifle ak chungin)-ah silver medal, passing out parade-a contribute tha ber, Continuity in Drill leh Best Cadet (sipai tha ber) in Army Service Corps lawmman a dawng bawk!

Pian leh murna
December ni 14, 1989 chhun dar 12:05-ah khan Presbyterian Hospital (tunah chuan Synod Hospital tih a ni tawh), Durtlang-ah Pu Ramliana leh Pi Lawmthangi te chuan fanu duhawm tak an hring a, a hmingah Babie Lalduhsangi sain khatih hunlai khan sipai officer ni-a Mizoram leh India ram puma thang chhuak turin an ring bik kher lo vang. Naupang hrisel tak ni chhovin unau pasarih zinga a naupang ber dawttu a ni a, a tette atanga harhvang leh inthazo tak a ni.

Shaolin lamtluang
Ramhlun North nula lo ni ta Babie-i hi a pain missionary tura a hual ruk ve rauh rauh a ni a, mahse, chu lam kawng chu a ngaihtuah lutuk lo! Thu erawh a awihin thunun a nuam viau thung a. Primary school a kal tan tirhin vawi khat chu China rama ‘Shaolin Temple’ kal a tum mauh pek a! A thiante nen wai wai tlem azawng paiin Chite lui atanga ke ngata chhuah kha an tum tlat mai a, khaw thim thleng pawha an haw tak loh avangin khawtlangin an zawng hial a, a thiante nen Chite lui kama zin dan tur ruahmanna an siam lai chu an zuk hruai haw ta a ni! Tlangvalhovin an paw haw a, a zak chu a muhil der char char nia!

Infiamna lamah
Chuti taka kungfu lam tuia Shaolin Temple hial kal a tum avang chuan a chhungte’n karate an zirtir ta nge nge a, kum 18 a nih meuh chuan Black Belt a ni ta der mai a. Karate lamah hian Mizoram tan a thawhhlawk em em a, National Games leh India ram pum huap inelna hrang hrangah gold medal 10 chuang lai a lo dawng tawh a, a karate career pumpuiah hian medal chi hrang hrang 4o chuang lai a hui tawh bawk! Karate rual hian judo lam pawh a titel ve zel a, lawmman chi hrang hrang a dawng tawh nghe nghe. Tunah hian All Mizoram Karate Association-ah instructress a ni mek a. Martial Arts bakah adventure sports lam a tui em em a, Para Sailing, Rafting & Conocing Course, Adventure Course leh Search & Rescue Course te a lo zo tawh a ni.

Zirna lam
Babie-i hian Saizahawla Boarding School, Aizawl atangin Matric chu 1st division-ah a pass a, Baptist Higher Secondary School, Lunglei atangin HSSLC a zo leh a, Govt. Hrangbana College, Aizawl atangin B.A (English) chu 2nd division-ah zo lehin a zawh kum hian Mizoram pumah mark hmu sang ber a ni hial. Kum hnih zet a chawlh lailawk hnuah Mizoram University-ah Master of Journalism & Mass Communication a zir leh a, hei erawh tuna a hna avangin a zo hman ta lo thung.

High School a kal tan tirh kum 2002 khan National Cadet Corps (NCC) Junior Wing a zawm nghal a. College a kal veleh 2007 khan NCC Senior Wing zawm lehin hetah hian ‘C’ certificate a nei nghe nghe.

College leh University a kal chhung hian pawl hrang hrangah inhmangin Evangelical Union-ah Prayer Secretary te niin, HBC Students’ Union-ah Debating Secretary a ni bawk a,  college Adventure Club lamah office bearers hna lo chelhin Mizoram University a luhthlak hnuah pawh kum 2013-2014 khan Students’ Council-ah Sports Secretary a ni ta zel a ni.
 

Indian Army a zawm
School leh college a kal lai atangin thil tum nghet tak a nei a, chu chu sipai officer nih a ni. A thil tumah a chiang a, a hriatna tizau turin a inzir zel bawk a, taksa, rilru leh thlarau lam thlengin nasa taka inbuatsaih a ngaih avangin chhel takin a bei hram hram a. Union Public Service Commission (UPSC) hnuaiah Combined Defence Service (CDS) exam paltlang a ngaih bakah Service Selection Board (SSB) hmaah interview leh tul dang paltlang a ngai bawk. Chutiang chuan CDS leh SSB hi tum 4 lai a paltlang tawh a, merit list-a lak thin an nih avangin lak loh zingah a tel leh thin a. Hmeichhe tan bik seat a awm tam loh thin avangin India ram puma 6-na a nih tum pawhin a tling zo lo hial a ni.

Chuti chung chuan a beidawng duh lo va, a thil tumah a chiang a, internet atangin zawhna sample download-in nasa takin a zir zel a,  CDS leh SSB paltlang tawh Mizo officer-te’n an tawnhriat an hrilhte chu a vawng reng bawk. Tichuan, kum 2014 a lo her chhuah chuan a thil tum tihlawhtling turin Combined Defence Service (CDS) exam bei lehin a paltlang a, hetih rual hian NCC Special Entry (CDS exam ngai lova SSB hmachhawn theihna) hmangin a tling chho tho bawk a, written exam chu tlin dan chi hnihin a tling a nih ber chu! Tichuan, NCC Special Entry hmanga interview tura koh a nih hmasak zawk avangin NCC Special Entry hmang chuan SSB chu a hmachhawn ta a. A ai tling leh chuang bik awm tawh lovin India ram pumah pakhatna a ni ta hial. Tum 6 lai a beih hnuin hlawhtlinna ropui tak a chang ta a ni.

Indian Army Officer ni tura test hrang hrang paltlang ngai zingah medical bikah hmeichhia chu an la thianghlim (virgin) leh thianghlim loh an en thin a, mipat hmeichhiatna lama inhmang tawh tan tlin ngaihna a awm lo. Ani erawh a tling ta a ni.

Mizo thalaite a cho!
Mitinin tum mumal tak neih leh mahni tui zawng leh thiam zawng hriatchian hmasak a, chu thil tum chu tihlawhtling tura theihtawp chhuaha beih leh, Pathian hre reng chunga thil tiha beidawnsan mai mai lo turin Babie-i hian Mizo thalaite a sawm mawlh mawlh a ni.

Mizote hi mi dang thatna aia chhiatna lam hriat reng chîng kan ni a, mi kan sawi dan hi mi hlawhtlinna leh hlawhchhamna thlentir theitu a nih avangin a tha zawnga chanchin insawisaka inhriatsak chu pawimawh a ti hle a. Tin, nu leh pa tam takin anmahni fate leh mi fate an khaikhin fo chu tha a ti lo hle bawk. Chu ai chuan an fate thiam zawng leh tui zawng hriatpui a, chumi kawnga theihtawp chhuaha kalpui zawk turin a sawm bawk.

Babie-i hi October ni 2 khan a awmna hmun tur 504, Army Service Corps, Allahabad lam panin a kal leh ta a, an service rei zawng hi kum 14 (Short Service Commission) niin chu aia rei pawh chu a duh chuan a thawk thei dawn a ni. A kal zelna turah ZORAM TODAY chuan duhsakna kan hlan e.