Rampum hriat hlawha Zoram kap chhuaktu Lalrinawmi Sailo

ZORAM TODAY | October 6-19 October, 2015

Sports huang hmasa lamah football chanchin kan ziak tawh a, tun tum chu Mizote lawm zawng tak, infiamna atan erawh hmanna chang kan hriat em em si loh - silai kah (rifle shooting) lam i’n hawi daih teh ang.

Mi tam zawk chuan intihsiakna pawh a awm tih kan hriat loh laiin thla hmasa mai khan Mizoram Rifle Association chuan Imphal, Manipur-a neih 3rd North East Zone Shooting Championship inelnaah infiam mi 26 lai tirin inelna hrang hrang (10m rifle, 10m pistol leh Point 22 Rifle shooting)-ah gold medal 3, silver medal 3 leh bronze medal 3 lain a pumpuiah 3-na dinhmun an hauh pha hial a. MRA hlawhtlinna hi ZORAM TODAY chuan a lawmpui hle a ni. ZORAM TODAY chuan he championship chhunga inelna sang ber International Shooting Sports Federation (ISSF) qualified chin chauh tel theihna 10m Rifle Shooting-a gold medalist Lalrinawmi Sailo belbulin biangbiakna kan nei thei hlauh mai a, a silai zinkawng chu hei hi a ni!
 

Silai a kap tan!
February, 2011 khan tun hma lama Mizote’n kan la hmelhriat ngai loh Air Rifle Open Sight (Mizo-in kan hmelhriat em em chi hi!) chu a kap ve chhin a, a lo hmutute’n ti mi dawn riauvin an hria a, heta tang hian amah pawh a tui chho tan nghal a ni. Mizoram Rifle Association-in club hrang hrang inelna a buatsaihah tel vein intihsiaknaa a telna hmasa berah Silver Medal (Junior category) a la nghal a. May thla a lo inher a, Aizawl District Rifle Association-in inelna an buatsaihah Junior Category-ah Gold Medal a la a. July thla a lo thlen meuh chuan Peep Sight (Intihsiakna lian thama an hman chi rifle) a kap ve chhin ta a. MRA-in Kulikawn-a an buatsaih state championship-ah Junior Category-ah bawk Gold Medal la lehin a silai kah tan kumah state aiawha National Championship-a tel turin thlan a ni nghal pang mai.

India ram state hrang hrangte inelna ‘All India G.V. Mavlankar’ chu 2011 October thla khan Gujarat-ah nghah a ni a, state hrang hrang atangin infiam mi thahnem tak an pungkhawm a, hemi tum hian Rinawmi hi Junior Category-ah Mizoram aiawha telin rin loh tak meuhvin India ram pumah pakhatna dinhmun a hauh pha hial a ni. Silai a kah hmasak ber atanga thla 8 pawh a ral hmain All India level-ah Gold Medalist dinhmun a hauh a nih chu! Hemi kum vek December thla hian National Shooting Championship-ah tel lehin International Shooting Sports Federation (ISSF) member ni pha turin a inkap tling bawk.

October thlaa inelna an neihna G.V Mavlankar-ah hian Mizoram Rifle Association hian kum 2010 atang khan infiammi an tir tan chauh a, an tirh tum 2-naah hetiang dinhmun hi an hauh thei a, MRA tan pawh hmasawnna ropui tak a tling. Rinawmi hian Mizo zinga Gold Medal la hmasa ber a ni chu ropui a tiin a nuna thil chhinchhiah tlak berah a ngai hial. Tun thleng hian National Level-ah Gold Medal la an la awm leh lo va, Rinawmi hi a hmasa ber leh a awm chhun a la ni rih.
 

Kum 2012-ah Mizoram Inter-Club Shooting Competition-ah 10m Air Pistol (open category) lamah telin pistol pawh a kap thiam viau mai, silver medal a dawng nghe nghe. Hemi kum vek hian State Championship open category Air Rifle-ah silver medal a dawng leh bawk.

Kum 2013 khan All India Rifle Association-in North East Zone Championship hmasa ber buatsaihin Mizoram-in kan thleng nghe nghe a nih kha. Khami tum khan a thiam bikte inelna (ISSF)-ah Gold Medal a la leh a. Zirna avangin 2014-ah a chhunzawm meuh lo va, practice-na hun leh hmun a neih loh avangin inelnaah lawmman lak a nei lem lo.

Jadavpur University atanga MA a pass chhuah hnuin August thla khan State Championship-ah ISSF Category-ah Gold Medal la lehin 3rd North East Zone Shooting Championship-ah Mizoram ai a awh leh nghal a, ISSF category-ah Gold Medal a kap chhuak leh ta bawk.

Inbuatsaihna lam
Rinawmi hi Pathian tih mi tak niin kohhran leh khawtlangah pawh a phak ang tawkin a inhmang ve thin a,  Kolkata-a lehkha zira a awm lai pawhin Mizo Christian Service-ah a inhmang hle a, amah hi zai thiam tak niin zaia rawngbawlna te neiin a theih tawkin a inhmang ve thin a, Electric veng YMA zaipawl-ah telin Pachhuanga University College-a a kal laiin College Week-ah solo competition-ah lawmman pakhatna te pawh a lo dawng ve tawh a ni.

Inelna a hmachhawn dawn reng rengin Pathian hnenah a inhlan thlap thin a, hnam dang, a bikin Hindu te chuan yoga te beiin concentration an nei tha em em a, chu chu Kristian nula tana tih ve a rem chiah loh avangin thawk han lak hak bak chu inbuatsaih dan a vang thin hle niin a sawi. Inelna an hmachhawn dawnin ngun takin practice an nei tlangpui a, practice-na atangin thuam famkim nen uluk taka tih chu a ngai pawimawh hle bawk. Chu chuan inelna puitling an hmachhawn hunah a pui em em a ni.

Chetchhiatna
National Shooter ho tana buatsaih thin Kumar Surendar Singh Competition 2013  Delhi-a an neih tumin practice lovin a kal ve ngawt a ni awm e. Kolkata lama lehkha zira a awm hnu a nih avangin inbuatsaihna hun a nei der si lo, ama sawi danin, “Kolkata atangin ka kal a, ka tichhe lutuk a, ka thin a chhe tawh bawk sia, silai ka chum puak a! Hria se chuan min disqualify nghal ang, an lo hre lo hlauh a!” nui hak hak chungin a sawi! Thinchhiat leh shooting a inmil lohzia a sawi uar hle bawk.

Hma lam hun
“Zirna leh infiamna hi keimahni discipline bikah chuan a intibuai lo hrim hrim, hun a spare theih zel mai,” tiin ZORM TODAY zawhna a chhang. Rinawmi hi tunah hian Black Hole Shooting Club member ni mekin December thlaa Jharkhand-a National Championship nei turin a inbuatsaih mek a ni.

Tlipna
Infiamna reng rengah tihtakzetna a pawimawh a, insum theihna leh mahni inrintawkna neih a ngai a, chutiang nei tur chuan inbuatsaihna tha neih pawh a pawimawh hle bawk. Chutiang zawng zawng chu Rinawmi atang hian zir chhuah tur a awm a, infiammi tam tak tan pawh amahah hian entawn tur thil tam tak hmuh tur a awm a ni. 

RINAWMI CHANCHIN TAWI
Saizuala Sailo leh F. Laldinpuii (L) te fanu pathum zinga a naupang ber Lalrinawmi hi February ni 18, 1992 khan Champhai Civil Hospital-ah a piang a, Aizawl lamah lehkha zirin tunah hian Electric Veng-ah an inbengbel tawh a ni. Lehkha zirna kawngah a tluang hle a, Oxford Higher Secondary School atangin matric chu 1st division-ah a zo va, Govt. Mizo Higher Secondary School-ah Arts subject zir chhunzawmin HSSLC 2nd division-ah a zo thung a, hetih hun lai vel hian silai lam hian a lung a la tileng chhin eih lo! A u-in volleyball a khelh thin avangin an zirtirtute’n a thiam ve ringin an khelhtir ve rawk a, volleyball lamah a hming a lang zui ta lem lo chu a nih hi! Pachhunga University College-ah Sociology subject zir chhunzawmin BA chu 1st division-ah a zo leh a, hemi tum hian Mizoram pumah 7-na a ni nghe nghe. Jadavpur University, Kolkata atangin M.A (Sociology) chu kumin 2015 khan tha takin a zo leh bawk.