Myanmar Zofate tan Zoram pen chhuak

ZORAM TODAY | August 17-31,  2015

Tun hnaia Myanmar-a Zofate’n tuilian an tawrhna chuan Zoram pum a tuam chhuak hneh hle a, pawl hrang hrangte chuan vehbur an khawn a, Chief Minister Pu Lal Thanhawla pawhin Prime Minister Narendra Modi hnenah lehkha thawnin, Myanmar tuilian tuarte tanpui turin a ngên hial a ni. He thu buatsaih laia tanpuina tam tak a lut tawh a, tanpuina khawn mek zel a ni bawk.

Mizoram-a tlawmngai pawl lian ber Central YMA chuan member tin hnenah tanpuina pawisa a khawn mek a, tanpuina an hmuh hmasak buhfai quintal 100 chu August ni 7, 2015 khan an thawn chhuak tawh a ni.

Mizoram-a kohhran lian ber Mizoram Presbyterian Kohhran chuan tualchhung kohhran tinah vehbur a khawn mek a, a duh tan Synod Office-ah pek theih a ni bawk. An vehbur khawn hi August thla chhunga pek khawm leh an tum.

Mizoram-a zirlai pawl lian pahnih, MZP General Headquarters leh MSU General Headquarters chuan tangkawpin vehbur khawn an rel. August ni 11, 2015 atang khan Aizawl-a High School achin chung lam zawng zirna inah vehbur an khawn a, hun remchanga hlan an tum a ni.

Zofa Global Network leh Green Mizoram Network chuan August ni 6 & 7 khan Aizawl khawpui hmun hrang hrangah mobile concert an nei a, cheng nuai thum chuang an hmuchhuak nghal a; anni hi Zoram atanga Myanmar Zofate tana che chhuak hmasa ber an ni.

LPS Vision leh Mizo Zaimi Insuihkhawm (MZI) General Headquarters tangkawp pawhin August ni 10, 2015 zan khan IGNITE Studio-ah live charity concert an nei a, tanpuina sum thahnem tak an hmuchhuak.

Tanpui ngaite tanpui nana zaithiam tam tak leh mi thahnemngaite intelkhawmna, People United in Music with the Purpose (PUMP) chuan Myanmar tuilian tuarte tanpui nan August ni 14 & 15 khan Millennium Centre-ah charity concert an buatsaih a, zaithiam tam tak zaiin tanpuina sum thahnem tak an hmu chhuak. Anni hi Nepal lirnghing tuarte tan an lo che chhuak tawh bawk.

Mizoram Cable TV lian ZONET chuan August ni 5, 2015 atang khan TV kaltlangin vehbur an khawn a, nitin mi tam takin tanpuina pawisa an thawhkhawm mek zel. Tanpuina hi a pe duh tan ZONET office-ah pek luh theih reng a ni. Anni hi Nepal lirnghing tuarte tan an lo che chhuak tawh nghe nghe.

Central YLA pawhin tanpuina an khawn mek a, an sub-headquarters, group leh branch zawng zawngah an khawn dawn a, an sum hmuhte hi a bo a bang awm lovin Zohnahthlak unaute tana hlan an tum.

April ni 4, 2015-a MADC Emergency Executive Meeting chuan tuilian tuarte tanpui ni se tiin ruahmanna an siam a, a bikin Hakha khawpuia mipuite tawrhna an thlir ho va, lawng hmangin buhfai quintal 500 an thawn tawh a ni.

Hengte bakah UPC (NEI) te, Lunglei lamah NGO Coordination te, party leh mimal \hahnem tak chuan Myanmar tuilian tanpui nan vehbur an khawn mek zek a ni.