Interview with Frozen Crew

ZORAM TODAY | August 17-31,  2015

(August ni 4, 2015 tlai lam a ni a, a hma zana kan inhrilh lâwk angin Okahito Studio 89, Chanmari-ah kan inhmu a, tlai dar 3:30-a inhmuh tum kan ni a, sikul leh college kal lai te an nih hlawm avangin an rawn thleng tlai hret. An practice routine tãwt tak karah inkawmna hun tha leh hlimawm tak kan nei thei a, kan lawm takzet a ni.)

ZT: Inkawmna hun tha tak min pe a, ZORAM TODAY hmingin lawmthu ka hrilh a che u. Zawhna kan nei nual a, ka zawt nghal mawp mawp mai ang che u aw.

FC: Keini pawh kan lawm lutuk. Duh duh min zawt rawh. A hmanhmawhthlak loh.

ZT: A hmasa berin in crew hi engtika in din nge? In din tan dan han sawi teh u.

FC: January ni 19, 2013 khan kan din. Kan din tan dan tak hi... (An nui deuh thú a) a ho ang reng. Kan thiante’n Chawlhhmun-ah Basketball Tournament final-a lâm turin min sawm a, kan inbe kual a, kalkawngah hming kan inphuah chawp a. Chuta tang chuan tun thlengin kan la ti chho zel a nih hi.

ZT: A hmain in inkawm sa em? In inkhuangrual lo sia. In veng awmna te a inang vek em ni?

FC: Kan inhre sa vek a, Tuithiang, Electric veng, Chanmari leh Chanmari West-ah te kan awm hlawm. Kan tuina a inang bawk a, a tih ve theih mai.

ZT: Kum 2 chuang lai in lo tiho ta a, lawmman lakte in nei tawh em?

FC: Kan nei ve nual. Crew pumpuia lak leh individual-a lak sawi kawp vek phei chuan a awm ve nual tawh ang. MZU Vibrio 2013 Got to Dance-ah 3-na, 2014-ah pakhatna; Jam-naah Boogie Down 2014 khan 2 v/s 2 All style-ah pakhatna kan ni bawk a; Power of Dance 2014, Kolasib-ah pakhatna; Rendesvouz 2015, Kolasib-ah 2 v/s 2 All style-ah pakhatna leh 1 v/s 1 B-boy-ah pakhatna; Rock The Beat 2015, Lunglei-ah 1 v/s 1 All style-ah pakhatna tho. Chuan, college leh school level velah pawh kan la ve nual tawh. Chuan, tuna mi kha a ni bawk a. (K-Pop Contest North East Region, Mizoram-a neihah khan pakhatna lawmman an la. -ZT)

ZT: Lawmman pawh in la hnem malh malh tawh hle mai. Tuin nge zirpui thin che u a, khawiah nge in zir thin?

FC: Keimahniin kan zir mai, a choreography velah hi chuan kan thiante paw’n idea an thawh ve tho. Dr. Reuben hi kan manager a nia, a studio (LH Hindi School)-ah kan zir thin. Chuan, K-Pop Contest zawh atang khan Okahito Studio 89 hian an studio a thlawnin min hmantir thin a, an chungah pawh kan lawm em em a ni.

ZT: A nih leh nangmahni inspire-tu cheu min han hrilh leh ula.

FC: (An sawi tliar tliar a) Chris Brown, Jabowakees, Lestwins, Mos Wanted leh BTS. Mos Wanted phei hi chu August thla tawp lam hian Delhi-ah an lo kal dawn a, a tihchi khawp mai.

ZT: Lam ni lo hi tuina dang in nei em?

FC: Basketball leh Art a ni mai, painting leh drawing vel hi kan tui ve hlawm. E chuan, Cosplay-ah Musoka Team-ah kan tel a, Drama leh Skit vel kan show ve thin. Chuan, a then hian nikum atang khan Taekwondo kan zir a, Green Belt kan ni tawh hlawm. Mizoram Amateur Taekwondo Association (MATA) Mission Team-ah kan tel ve bawk.

ZT: Music Video-ah emaw, YouTube velah te in video vel hmuh tur a awm em?

FC: YouTube-ah chuan kan la dah lo. Mahse, competition vel ami chu a awm ve ang. Clip tawi tê tê chu kan nei a, upload chhoh ve tan kan tum. Hmingtea music video-ah te kan lâm a, Lawma leh Judith-i te video-ah te, Dintluanga ‘Naktukah Eng nge thleng dawn?’ tih leh ‘Si Maw’ Tetei Ralte leh u Reuben-a te hlaah khan kan lang hlawm.

ZT:  Ti daih ila, ngaihzawngte hi in nei ve tawh ang a?

FC: An nui deuh ham ham a, pakhat aia tam nei te pawh kan awm maithei. A.. nei lo a ni mai. Hahaha.

ZT: COC in khel thin a ni maw? (Kan interview laia lo khel mawlh mawlh te pawh an awm)

FC: Khel ve zeuh zeuh…hehehe…

ZT: A nih K-Pop Contest a awm dawn tih hi engtin nge in hriat? Engtin nge in inbuatsaih?

FC: Zovi hnena atangin kan hria a, ani hi kan crew member tho a nia, mahse, tun contest-ah khan kan member tho Zaii (Lushai Diamonds) nen a hrang ve vein an tel a. K-Pop contest bikah chuan a pa hlangin kan tel ta a nih hi. June thla atangin kan zir tan a, a pumpui chuan kar hnih vel kan zir ang. BTS ho hla kha kan cover ta a, kan vannei a, winner kan lo ni ve hlauh a.  

ZT: Final Round hi Delhi-ah in nei dawn a ni a, engtin nge in inbuatsaih le?

FC: Aw, kar khatah ni thum kan practice a, Okahito hian a thlawnin an studio min hmantir char char a, kan zir tum chuan darkar 3 vel kan zir ziah. Chuan, fitness hi kan keep up reng a, zingah te kan tlàn a. 

ZT: A nih zûk leh hmuam lam te in fihlim em?

FC: Fihlim a ni deuh mai. (Zu ru ve zeuh zeuh thin chu an awm a ni mai thei, an kawk ru zauh zauh!)

ZT: Delhi pan chuan engtikah nge in kal dawn? Tu nge hruai dawn che u?

FC: August ni 21 hian kal kan tum a, a hautak ang reng sia, keimahni’n kan kal ang. Delhi-ah u Reuben-a a awm sa bawk a.

ZT: Sponsorship lam te?

FC: Sponsorship kan nei em em lo. U Mangheti (Mangheti Beauty Concept) khan a hma atangin min pui a. Tunah phei chuan kan nei em em lo. Kan zawng ve nual a, kan la hmu lo a nih hi.

ZT: A pawi hle mai. Sponsor-tu tha tak in hmuh ngei kan duhsak a che u. Lawmthu sawi duhna te in nei em?

FC: Aw, a hmasa berah chuan Pathian a nia, chuan kan chhungte leh thiante. Kan manager Dr. Reuben, MBC leh Okahito Studio 89 te chungah kan lawm takzet a ni.

ZT: Hun tha tak min pe a, in chungah kan lawm tak zet a, in kal zelna turah ZORAM TODAY chuan duhsakna kan hlan a che u.

FC: Keini pawh kan lawm e.

____________

Crew Name : Frozen Crew

Din kum         : 2013

Crew Line Up : K-Pop Contest atan bik

• Lalrinawma (Kevin)—3rd Sem. BA (History), HBC.

• Isaac Ramdinthara (Caasi)—Graduated Class XII from NIOS.

• Gabriel Remsangzuala (Jin)—Class X, Oxford HSS.

• John Lalthafamkima (Rain)—1st Sem. BA (Psychology), HBC.

• Jonathan Lalrinpuia (Lil-Jae)—Class IX, Govt. Mizo H.S.

• PC Lalrinmawia (PeeCee)—Class X, New Horizon School of Education.

• H. Lalramthianghlima (Rozzin)—Class VIII, Mount Carmel School.