ZORAM TODAY | August 17-31, 2015 —Kimi Colney
Karoly Takacs hming hi i la hrelo maithei a, Hungary ramah chuan an mi chhuanvawr leh a ram mipuite ngaihsan ber a ni. An ramah chuan a larin a chanchin pawh an sawi nasa thin hle. He thu i chhiar atangin tunge a nih i hre ngei ang.
Kum 1938 khan Karoly Takacs hi Hungarian Army-ah telin, khawvel puma pistol kah thiam ber a ni. A thiam em avangin kum 1940-a Japan khawpui Tokyo-a Olympic Games lo awm turah mipui chuan gold medal a rawn hawn ngei an ring.
Mahse, heng beiseina leh suangtuahnate hi Olympic tan hma kum lawkin, ni khat thil thu-ah a thamral vek mai. Sipaihovin training an neihna hmunah chuan Takacs chuan a kut dinglamin grenade a keng puak palh hlauh mai a, a kut dinglam hi silai a kahna lam ber a ni si, Karoly Takacs-a tan chuan Olympic-a gold medal lak chu sawi loh, a tel pawh a tel thei kher ang em, tih zawhna a lian ta hle.
Thla khat chhung chu beidawng takin damdawiinah inenkawlin hun a hmang a; a chunga thil lo thleng chuan a tilungngai em em a, a hmachhawp leh an ramin beiseina an neihna ber a nih si avangin pawi a tih zual bawk. A dinhmunah hian mi \henkhat chu ding sela, beidawng takin an nun an hmang ral ngei ang. Amaherawhchu, Karoly Takacs-a chuan a vanduaina chu hmasawn nan a hmang ta daih mai.
Takacs-a hian hospital a chhuahsan hnuah chuan mite rin phak bak thil a ti ta tlat! A kut tha zawk lam, a kut veilamin silai kah a zir ta tauh tauh va, ‘Eng vangin nge ka theih loh vang?’ tih chu a thupui leh a thuvawn a ni.
A thil neih tawh loh – khawvel hriatpui tham ‘kut dinglam silai kah thiamna’-ah a hlohvah a rilru sêng duh lovin, a thil la neih a kut veilamah a ngaihtuahna a sêng ta zawk a. Inkahna hmuna thluak fing tak a neih thin leh a kut veilam hrisel tak a neih chu a tangkai thei ang bera hman a tum tawp mai a ni. Olympic tan hma lawkah a thiam loh lamin silai kah a zir tauh tauh va, chutiang chuan gold medal lak a la inbeisei cheu nia! Thla eng emaw zat chu Karoly Takacs chuan mi hriat lovin a silai kah a zir tlut tlut a, midang thusawi a ngaihthlak tam chuan a beidawn rum rumna tur an thlen palh ang tih a hlau hle nghe nghe.
Kum 1939 a lo nih chuan Takacs-a chu Hungarian National Pistol Shooting Championship-ah a rawn lang leh ta hlawl mai. Mipui leh silai kap thiam dangte’n an lo hmuh chuan an tawrhpui thu hrilhin, an kap lai en thei tura huaisenna a la neih avanga an lawmpui thu te an lo hrilh a. Mahse, ani chuan, “He hmunah hian mipui zinga tela entu ni turin ka lo kal lo, intihsiaknaa tel turin ka lo kal a ni zawk,” a han tih chuan mak an ti em em a, gold medal a han la nghal zat phei chu mipuite mak tih a tling takzet.
Kum 1940 leh 1944-a Olympic awm tur chu Indopui-II-na avangin thulh a ni a, he thil hian Takacs-a Olympic gold medal lak beiseina zawng zawng a tihtawp vek a rinawm. Mahse, a ni hauh lo! Beidawng duh hauh lovin, chu hun chu remchangah hmangin a inzir char char a, kum 1948-a London Olympic-ah chuan a tum ram thlengin, gold medal a dawng ta a, chu mai a ni lo, world record a siam hial a ni! Hetih lai hian Takacs-a chu kum 38 a ni tawh nghe nghe. Kum 1952-a Helsinki Olympic-ah gold medal a la leh a, a thawhrimna leh tumruhna chuan Olympic gold medal chu vawi khat mai ni lo, vawi hnih lai a dawntir a, world record a siam thei ta hial a ni.
Khawvela a chak ber leh thiam ber kan tihte hi eng kawngah pawh beidawnna aia beiseina nei lian zawk zelte an ni; tlûk leh tlâk chang nei mah se, ropui takin an ding chhuak leh thin. Boxer-te hian an tlûkin second sawm chhung hun an nei a, second 11 hnuah tho leh pawh ni se, chak lo zawk an ni tawh tho tho thin. Chutiang bawk chuan, vanduaina kan tawh changa mahni inkhawngaih leh a thim zawng hlir ngaihtuaha hun kan hman chuan, kan insiamthatna hun tha neih kan bawhpelh a, kan tlai ta thin a ni.
Mi chak chuan harsatna hi a tihreh dan tur an zawng a, mi chak lo leh dawihzep erawh chuan tlansan dan tur ngawt an ngaihtuah thin.
Comments
Post a Comment